Tilkynning
11. júní 2020Í gær afhenti Snædís Lilja Káradóttir, fyrir hönd ungliðahreyfingar Íslandsdeildar Amnesty International, Guðlaugi Þór Þórðarsyni utanríkisráðherra undirskriftir 2342 einstaklinga sem skrifuðu undir ákall þar sem krafist er þess að íslensk stjórnvöld veki athygli á stöðu mannréttinda í Íran á alþjóðavettvangi.
Einnig er þess krafist að íslensk stjórnvöld beiti sér fyrir því að tryggja ábyrgðarskyldu íranskra stjórnvalda vegna grimmilegra aðgerða þeirra gegn friðsamlegum mótmælum sem brutust út þar í landi 15. – 19. nóvember 2019. Að minnsta kosti 304 voru myrtir, þar af 23 börn, og þúsundir særðust.
Í febrúar síðastliðinn stóð ungliðahreyfingin fyrir táknrænni aðgerð sem fór fram á Lækjartorgi þar sem teiknaðar voru útlínur fjölda þeirra sem létust í aðgerðum íranskra stjórnvalda í nóvember síðastliðnum.
Eftir afhendingu undirskriftanna ræddu Snædís og starfsfólk Íslandsdeildar Amnesty International frekar við utanríkisráðherra og Davíð Loga Sigurðsson, deildarstjóra alþjóða- og þróunarsamvinnuskrifstofu, um mannréttindaástandið í Íran.
Þar voru kröfur Amnesty International áréttaðar, til að mynda að íslensk stjórnvöld veki athygli á stöðu mannréttinda í Íran og beiti sér fyrir því innan mannréttindaráðs Sameinuðu þjóðanna að rannsókn verði gerð á ólögmætum aftökum á mótmælendum, handtökum, þvinguðum mannshvörfum og pyndingum fanga sem hafa átt sér stað þar í landi síðan 15. nóvember, með það fyrir augum að tryggja ábyrgðarskyldu íranskra stjórnvalda.
Ísland og Mannréttindaráð Sameinuðu Þjóðanna
Ráðherra tók við ákallinu og tjáði Íslandsdeild og ungliðahreyfingunni að Ísland hefði nýverið gerst aðili að svokölluðum ,,kjarnahópi” ríkja á vettvangi mannréttindaráðs Sameinuðu Þjóðanna um ályktun vegna stöðu mannréttindamála í Íran. Í fundarlotu ráðsins í mars tók Ísland einnig virkan þátt í umræðum þar sem fordæmd var framganga stjórnvalda Írans gagnvart mótmælunum í nóvember.
Íslandsdeild Amnesty International fagnar því að Ísland hafi gerst aðili að umræddum kjarnahópi.
Framganga Íslands í Mannréttindaráði Sameinuðu þjóðanna hefur verið gríðarlega mikilvæg og hefur Ísland sýnt leiðtogafærni sína í verki. Bæði hafði Ísland frumkvæði að því að flutt var sameiginlegt ávarp um bágt ástand mannréttinda í Sádi-Arabíu á síðasta ári og að samþykkt var ályktun um alvarlega stöðu mannréttinda á Filippseyjum.
Afrakstur þeirra vinnu er ný skýrsla Mannréttindaskrifstofu Sameinuðu
þjóðanna um Filippseyjar sem kom út 4. júní síðastliðinn.
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu