Fréttir
9. maí 2019Formaður allsherjar- og menntamálanefndar, Páll Magnússon, tók í dag á móti ákalli Íslandsdeildar Amnesty International um verndun mannréttinda intersex barna á Íslandi ásamt 3252 undirskriftum einstaklinga víðsvegar að úr heiminum meðal annars frá Þýskalandi, Svíþjóð og Bandaríkjunum.
Við afhendingu undirskriftanna í dag sagði framkvæmdastjóri Íslandsdeildar Amnesty International, Anna Lúðvíksdóttir að gríðarlega mikilvægt sé að tryggt verði að börn og fullorðnir með ódæmigerð líffræðileg kyneinkenni njóti fullrar mannréttindaverndar. Íslensk stjórnvöld mega ekki láta þetta tækifæri glatast til að koma þegar í stað í veg fyrir ónauðsynlegar og inngripsmiklar aðgerðir á börnum sem geta haft langvarandi neikvæðar afleiðingar á líkamlega og andlega heilsu þeirra.
Íslandsdeild Amnesty International fagnar þeim skrefum sem ríkisstjórn Íslands er nú að taka í átt að því að koma Íslandi í fremstu röð í málefnum hinsegin fólks með löggjöf um kynrænt sjálfræði.
Frumvarp til laga um kynrænt sjálfræði, sem nú er til umfjöllunar í allsherjar- og menntamálanefnd, ætti einnig að skapa tækifæri til að vernda réttindi intersex barna og fullorðinna en í núverandi drögum að frumvarpinu er vöntun á mikilvægri vernd fyrir intersex börn.
Amnesty International skorar á íslensk yfirvöld að tryggja og vernda jafna meðferð einstaklinga með ódæmigerð líffræðileg kyneinkenni bæði í lögum og framkvæmd. Frumvarpið veitir tækifæri til þess að takast á við þessa áskorun en eins og drögin líta út í dag er tækifærið ekki nýtt til að koma í veg fyrir ónauðsynleg og óafturkræf læknisfræðileg inngrip sem miða að því að laga líkama barna að stöðluðum kynjahugmyndum með skurðaðgerðum, ófrjósemisaðgerðum og öðrum meðferðum á intersex börnum án upplýsts samþykkis þeirra, án þess að fela í sér hegningarákvæði.
Amnesty International skorar einnig á íslensk yfirvöld að koma á sérhæfðri og þverfaglegri nálgun á meðferð einstaklinga með ódæmigerð líffræðileg kyneinkenni og móta og innleiða skýrt mannréttindamiðað verklag til að tryggja að börn og fullorðnir með ódæmigerð líffræðileg kyneinkenni njóti mannréttindaverndar sem tryggir friðhelgi líkama þeirra, sjálfræði og sjálfsákvörðunarrétt. Yfirvöld skulu tryggja að ekkert barn með ódæmigerð líffræðileg kyneinkenni sæti skaðlegum, óafturkræfum og ónauðsynlegum inngripum í líkama þeirra.
Þá hvetur Amnesty International íslenska þingmenn að standa með trans og intersex fólki og styðja frumvarp til laga um kynrænt sjálfræði.
„Við erum sannarlega bjartsýn á að stjórnvöld sjái að í lögum um kynrænt sjálfræði án ákvæðis um vernd barna gegn ónauðsynlegum læknisfræðilegum inngripum misferst að veita börnum með ódæmigerð kyneinkenni óskoraðan rétt til sjálfræðis yfir eigin líkama,“ sagði Anna að lokum.
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu