Yfirlýsing
4. júlí 2019Í dag, þann 4. júlí 2019, sendi ungliðahreyfing Amnesty International ásamt ungmennaráði UNICEF á Íslandi, ungmennaráði Barnaheilla og ráðgjafarhóps Umboðsmanns barna frá sér sameiginlega yfirlýsingu vegna brottvísana barna á flótta aftur til Grikklands. Ungmennaráðin skora á yfirvöld að grípa til aðgerða og vernda börn á flótta eins og þeim ber skylda til, sama hvað það kostar.
Yfirlýsingin í heild sinni:
Sameiginleg yfirlýsing ungmennaráðs UNICEF á Íslandi, ungmennaráðs Barnaheilla, Ráðgjafarhóps Umboðsmanns barna og ungliðahreyfingar Amnesty International vegna brottvísana barna á flótta.
Seinustu daga hefur mikið verið fjallað um brottvísanir barna á flótta frá Íslandi og þá sérstaklega mál Shahnaz Safari og barna hennar tveggja, Zainab og Amil. Mikil samstaða er á milli ráðanna sem standa að þessari yfirlýsingu um að brottvísanir barna til Grikklands, þar sem þau hafa fengið alþjóðlega vernd en hafa þrátt fyrir það leitað hingað til lands, þurfi að stöðva og sömuleiðis brottvísanir fjölskyldna með börn.
Árið 2013 lögfesti Ísland Barnasáttmálann og hefur hann því sama gildi og hver önnur lög og ber stjórnvöldum þá skylda til að framfylgja honum jafnt öðrum lögum. Í Barnasáttmálanum stendur:
,,Aðildarríki skulu virða og tryggja hverju barni innan lögsögu sinnar þau réttindi sem kveðið er á um í samningi þessum, án mismununar af nokkru tagi, án tillits til kynþáttar, litarháttar, kynferðis, tungu, trúarbragða, stjórnmálaskoðana eða annarra skoðana, uppruna með tilliti til þjóðernis, þjóðhátta eða félagslegrar stöðu, eigna, fötlunar, ætternis eða annarra aðstæðna.” Einnig segir að ,,Það sem barni er fyrir bestu skal ávallt hafa forgang þegar félagsmálastofnanir á vegum hins opinbera eða einkaaðila, dómstólar, stjórnvöld eða löggjafarstofnanir gera ráðstafanir sem varða börn.”
UNICEF á Íslandi og önnur félagasamtök hafa reynt að vekja athygli á því að aðstæður flóttabarna í Grikklandi eru óviðunandi og er það skoðun ráðanna að það sé alls ekki verið að gæta hagsmuna barna með því að vísa þeim þangað, heldur þvert á móti. Aðstæðum í Grikklandi hefur verið lýst sem ógnandi og ómannúðlegum. Þar er lítið aðgengi að grunnmenntun fyrir börn og lítill stuðningur í boði vegna fjölda flóttamanna. Ísland er í þeirri stöðu að geta tekið á móti umræddum börnum og veitt þeim: tækifæri til menntunar, aðgengi að heilbrigðiskerfi og annan stuðning. Börn eiga ekki að þurfa að flakka á milli landa. Börn eiga alltaf rétt á vernd sama í hvaða ríki þau dvelja og þá sérstaklega í velferðarríki eins og á Íslandi. Hættum að synja börnum um tækifæri til að alast upp í öruggu umhverfi.
Stjórnvöld þurfa að virða Barnasáttmálann og tryggja að honum sé framfylgt svo réttindi barna á flótta séu ávallt tryggð. Byrjum að taka Barnasáttmálann alvarlega því börnin okkar og börnin sem hingað koma eru framtíð okkar og nútíð. Ekkert segir jafnmikið um þjóðfélag eins og hvernig það hugsar um börnin sín og Ísland ætti að vera fremst í flokki hvað það varðar. Barnasáttmálinn nær til allra barna innan lögsögu Íslands og ætti ekkert barn á Íslandi að þurfa óttast hvar það gistir í næstu viku eða að fá ekki grunnmenntun eða vernd.
Við skorum á yfirvöld að grípa til aðgerða og vernda börn á flótta eins og stjónvöldum ber skylda til, sama hvað það kostar!
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu