Nokkur umræða hefur verið hér á landi að undanförnu vegna hugsanlegra heimilda til handa íslensku lögreglunni til að bera rafbyssur við störf sín. Í ljósi þeirra staðreynda sem fyrir liggja, bæði hættu á misnotkun, fjölda dauðsfalla þar sem rafbyssur koma við sögu og þeirri staðreynd að þær valda miklum sársauka sem getur jafnast á við pyndingar hefur Íslandsdeild Amnesty International lagt áherslu á að íslensk lögregluyfirvöld taki ekki upp rafbyssur hér á landi.

Yfir 3.000 palestínskir flóttamenn, sem flúið hafa ofbeldið í Írak, búa við skelfilegar aðstæður um þessar mundir. Þeir hafa lítið samband við umheiminn og njóta ekki fullnægjandi mannúðaraðstoðar. Í mars 2008 hittu fulltrúar frá Amnesty International palestínskt flóttafólk sem er innilokað í al-Tanf búðunum á einskis manns landi á landamærum Írak og Sýrlands.

Leiðtogar í Mið-Afríku og SÞ hafa verið hvött til að tryggja lausn yfir 350 manna, kvenna og barna sem talið er að Andstöðuher drottins (the Lord’s Resistance Army) hafi rænt á undanförnum vikum.

Í aðdraganda heimsóknar Mahmoud Abbas til Íslands fór Íslandsdeild Amnesty International þess á leit við Ingibjörgu Sólrúnu Gísladóttur utanríkisráðherra og Ólaf Ragnar Grímsson forseta að þau ræddu yfirvofandi aftöku hins 23 ára gamla Tha’er Mahmoud Husni Rmailat og færu fram á að Mahmoud Abbas skrifi ekki undir aftökuskipunina.

Íslandsdeild Amnesty International hefur sent samhljóða bréf til forseta Íslands Ólafs Ragnars Grímssonar og utanríkisráðherra Ingibjargar Sólrúnar Gísladóttur. Í bréfinu er vakin athygli á alvarlegu ástandi mannréttinda á palestínsku sjálfstjórnarsvæðunum og íslenskir ráðamenn hvattir til að taka upp mannréttindamál í viðræðum við Mahmoud Abbas.

Að minnsta kosti 1.200 einstaklingar voru teknir af lífi árið 2007 og ríkisvaldið tekur marga aðra til viðbótar af lífi með leynd í löndum eins og Kína, Mongólíu og Víetnam.

Formaður Amnesty International á Íslandi, Davíð Þór Jónsson, ræddi við Ævar Örn Jósepsson um starf samtakanna í þættinum Endurvinnslunni á Rás 2 13. apríl.

Kúbversk yfirvöld hafa sleppt fjórum baráttumönnum fyrir mannréttindum úr fangelsi. Fjórmenningarnir voru handteknir í fjöldahandtökum vegna pólitískrar þátttöku í mars 2003 þar sem alls 75 mótmælendur voru handteknir.

Flugkennari vann mál fyrir áfrýjunardómstóli í Englandi þann 14. febrúar síðastliðinn. Hann var ranglega ásakaður um að hafa þjálfað ræningja flugvélanna sem notaðar voru í árásunum 11 september árið 2001 í Bandaríkjunum.

Fyrrum aðstoðarritstjóra hvítrússnesks dagblaðs hefur verið sleppt úr fangelsi fyrr en til stóð. Þann 22. febrúar 2008 mildaði hæstiréttur Hvíta-Rússlands dóminn yfir Alyaksandr Zdzvizhkou úr þremur árum í þrjá mánuði.

Fyrstu réttarhöldin í Gvatemala vegna þvingaðra mannshvarfa hófust þar í mars 2008. Felipe Gusanero, sem tilheyrði sveitum tengdum hernum, var ákærður mánudaginn 10. mars fyrir að vera viðriðinn þvinguð mannshvörf sex óbreyttra borgara, með vitund og vilja hersins.

Marokkóbúi sem var fangelsaður fyrir að búa til Facebook svipmynd af prinsi hefur verið leystur úr fangelsi. Fouad Mourtada, sem er 26 ára verkfræðingur, var leystur úr haldi 18. mars síðastliðinn eftir að konungur landsins náðaði hann.