Fréttir
10. október 2019Á alþjóðadegi gegn dauðarefsingunni, 10. október, gefur Amnesty International út skýrslu um dauðarefsinguna í Malasíu: Fatally flawed: Why Malaysia must abolish the death penalty.
Í skýrslunni kemur fram að pyndingum og annarri illri meðferð er beitt í Malasíu til að ná fram játningu, aðgengi að lögfræðingi er ábótavant, ferlið fyrir náðun er torskilið og brotið er á réttinum til sanngjarnra réttarhalda.
Brotið á réttindum einstaklinga í haldi
Algengt er að einstaklingar séu barðir til að ná fram játningu. Í rannsókn sem unnin var af vinnuhóp Sameinuðu þjóðanna árið 2011 kom í ljós að næstum allir fangar höfðu verið beittir pyndingum og annarri illri meðferð við yfirheyrslur.
Dæmi eru um að einstaklingar hafi verið beðnir um að skrifa undir skjöl á malasísku án kunnáttu í tungumálinu. Hoo Yew Wah, malasískur ríkisborgari af kínverskum uppruna, var handtekinn tvítugur með amfetamín í fórum sínum. Hann var dæmdur sekur fyrir athæfið en sakfellinging byggði á skýrslu sem tekin hafði verið á móðurmáli hans en lögreglan hafði skráð á malasísku. Hann segir að skjalið sem hann hafi skrifað undir hafi ekki verið rétt og hann hafi verið þvingaður til að skrifa undir það án þess að hafa aðgang að lögfræðingi. Hoo Yew Wah hefur verið á dauðadeild frá árinu 2011.
Fjöldi erlendra ríkisborgara á dauðadeild
Í Malasíu eru 930 einstaklingar eða 73% allra fanga á dauðadeild dæmdir vegna brota sem tengjast vímuefnum en það er brot á alþjóðlegum mannréttindalögum. Af þeim 1281 fanga á dauðadeild í Malasíu í febrúar 2019 voru 558 erlendir ríkisborgarar (44%) og eiga þeir í erfiðleikum að sækja sér lögfræðilegrar aðstoðar og fá túlk. Að auki eru einstaklingar í viðkvæmri stöðu og úr minnihlutahópum stór hluti þeirra sem eru á dauðadeild.
Níu af hverjum tíu konum sem eru á dauðadeild eru erlendir ríkisborgarar. Í mörgum tilfellum sögðu konurnar að þær hefðu neyðst til að smygla vímuefnum vegna fjárhagsstöðu sinnar eða voru þvingaðar til þess. Þar sem dauðarefsing er lögboðin fyrir vímuefnabrot er ekki hægt að taka tillit til slíkra aðstæðna. Skortur er á skýru ferli um hvernig hægt sé að sækja um náðun og bitnar það helst á erlendum ríkisborgurum þar sem helmingur þeirra hefur ekki sótt um náðun.
Ný löggjöf þarf að ganga lengra
Fyrir ári tilkynnti ný stjórn í Malasíu að afnema ætti dauðarefsinguna fyrir alla glæpi og var sett aftökuhlé í júlí árið 2018. Í Malasíu eru 33 tegundir glæpa gerðir refsiverðir með dauðarefsingu og þar af eru 13 þeirra lögbundnir.
Í nýrri löggjöf sem er búist við að stjórnvöld leggi fram á næstunni er aðeins lagt til að afnumin verði lögbundin dauðarefsing fyrir 11 tegundir glæpa, þar á meðal vímuefnabrot.
Amnesty International kallar eftir áframhaldandi aftökuhléi og að ný löggjöf afnemi alla lögbundna dauðarefsingu í Malasíu.
Alþjóðleg þróun í átt að afnámi dauðarefsingarinnar
Fyrr á þessu ári kom út árleg skýrsla Amnesty International um dauðarefsinguna fyrir árið 2018. Þar kom fram að þróunin á alþjóðavísu er í átt að afnámi dauðarefsingarinnar þó að aukning hafi verið á aftökum í Hvíta-Rússlandi, Japan, Singapúr, Suður-Súdan og Bandaríkjunum árið 2018. Aftökum í Íran fækkaði um helming í kjölfar breytinga á löggjöf um vímuefni. Einnig var fækkun á aftökum í Írak, Pakistan og Sómalíu sem leiddi til þess að fjöldi aftaka á heimsvísu fækkaði úr 993 í 690 árið 2018 miðað við árið áður.
„Þrátt fyrir skref aftur á bak í sumum tilfellum er veruleg fækkun á aftökum hjá þeim sem hafa staðið sig hvað verst. Það gefur von um að það sé aðeins tímaspursmál hvenær þessi grimma refsing verði úr sögunni.“
Kumi Naidoo aðalframkvæmdastjóri Amnesty International.
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu