Íslensk stjórnvöld beiti sér á alþjóðavettvangi
Í Íran fer ástand mannréttinda stöðugt versnandi. Stjórnvöld brjóta á rétti borgara sinna til tjáningarfrelsis, félaga- og fundafrelsis. Konur verða fyrir margvíslegri mismunun og þeim refsað fyrir að láta sjá sig opinberlega án höfuðslæðu. Baráttukonur fyrir mannréttindum eru fangelsaðar fyrir að mótmæla ástandinu með friðsömum hætti. Pyndingum og annarri illri meðferð er beitt án þess að gerendur séu dregnir til ábyrgðar. Þá er dauðarefsingin enn lögleg í Íran, auk þess sem aftökur eru framkvæmdar án dóms og laga.
Blóðug herferð gegn mótmælendum
Að undanförnu hafa yfirvöld í Íran staðið fyrir grimmilegum aðgerðum í kjölfar mótmæla landsmanna sem brutust út þann 15. nóvember síðastliðinn. Þúsundir mótmælenda hafa verið handteknir, auk blaðamanna, baráttufólks fyrir mannréttindum og háskólanema til að koma í veg fyrir að þeir veki máls á þeirri miskunnarlausu kúgun sem á sér stað í Íran.
Amnesty International hefur tekið viðtöl við tugi einstaklinga sem hafa lýst því hvernig írönsk stjórnvöld, vegna mótmælanna, halda pólitískum föngum í einangrun og beita þvinguðum mannshvörfum, pyndingum og annarri illri meðferð.
Samkvæmt skýrslum Amnesty International voru að minnsta kosti 304 myrtir og þúsundir særðust dagana 15. til 18. nóvember þegar yfirvöld leystu upp friðsamleg mótmæli með mannskæðum aðgerðum. Írönsk yfirvöld hafa neitað að opinbera tölur yfir fjölda látinna.
Frásagnir vitna og ættingja fórnarlamba, upplýsingar frá mannréttindasinnum og blaðafólki utan Írans og myndbönd sem Amnesty International hefur rannsakað ítarlega sýna skýrt að öryggissveitir hafa af ásettu ráði beitt skotvopnum gegn óvopnuðum mótmælendum sem engin ógn stafaði af. Meirihluti dauðsfalla sem Amnesty International hefur rannsakað voru af völdum byssuskota í höfuð, háls og önnur lífsnauðsynleg líffæri sem bendir til þess að öryggissveitir hafi myrt mótmælendur af ásettu ráði.
Sameinuðu þjóðirnar hafa lýst því yfir að þær búi yfir upplýsingum sem benda til þess að að minnsta kosti 12 börn séu meðal hinna látnu. Samkvæmt rannsóknum Amnesty International eru þeirra á meðal hinn 15 ára gamli Mohammad Dastankhah sem var myrtur í Shiraz í Fars-héraði er hann gekk framhjá mótælum á leið heim úr skólanum og hinn 17 ára gamli Alireza Nouri sem var myrtur í Shahriar í Teheran-héraði.
Skrifaðu undir núna og kallaðu eftir því að íslensk stjórnvöld veki athygli á stöðu mannréttinda í Íran og krefjist aðgerða á alþjóðavettvangi!
Pyndingar og önnur ill meðferð
Pyndingum og annarri illri meðferð, þar með talin langvarandi einangrun og neitun um læknishjálp, er beitt á kerfisbundinn hátt í Íran. Óháðar rannsóknir á ásökunum um pyndingar og aðra illa meðferð eru engar og dómstólar taka gildar „játningar“, er náðst hafa fram með pyndingum, sem sönnunargögn til sakfellingar.
Frásagnir sjónarvotta og myndbandsupptökur benda til þess að sumir þeirra sem hafa tekið þátt í mótmælunum sem brutust út í síðasta mánuði hafi verið beittir pyndingum og annari illri meðferð, meðal annars með barsmíðum og hýðingum. Fórnarlömb og sjónarvottar hafa einnig sagt Amnesty International að íranskar öryggissveitir hafi gert árásir á sjúkrahús víðs vegar um landið, handtekið mótmælendur og flutt þá í fangelsi og neitað þeim um aðgang að lífsnauðsynlegri læknishjálp.
Einnig hafa baráttukonur sem staðið hafa fyrir friðsamlegum mótmælum gegn löggjöf um höfuðslæður þurft að þola pyndingar og aðra illa meðferð, með áköfum yfirheyrslum og langvarandi einangrunarvist.
Mótmæla lögum um höfuðslæðu
Í Íran telst það glæpur ef kona er án höfuðslæðu á almannafæri. Síðastliðin ár hefur hreyfing kvenna og stúlkna sem mótmæla löggjöf um höfuðslæður farið vaxandi. Karlar hafa einnig tekið þátt í baráttunni. Sama á við um konur sem kjósa að vera með höfuðslæðu, því hreyfingin snýst um val: rétt kvenna til að velja hverju þær klæðast án þess að óttast áreiti, ofbeldi, hótanir eða fangelsisrefsingu.
Hin 24 ára gamla, Yasaman Aryani, er ein þeirra sem mótmælt hafa lögunum.Á alþjóðlegum baráttudegi kvenna 2019 ákváðu hún og móðir hennar að ganga með hárið óhulið um lestarvagn einungis ætlaðan konum þar sem þær dreifðu hvítum blómum meðal farþega. Yasaman talaði um framtíðarvonir sínar þegar allar konur hefðu frelsi til að velja hverju þær klæðast. Eftir að myndbandi af viðburðinum var dreift á internetinu var Yasaman handtekin og haldið í einangrun svo dögum skipti á meðan hún var yfirheyrð. Hún hafði ekki aðgang að lögfræðingi á meðan á réttarhöldum í máli hennar stóð og sagði dómarann hafa beitt sig andlegu ofbeldi og hótunum. Í raun var um sýndarréttarhöld að ræða og ranglega var dæmt í málinu. Yasaman hlaut 16 ára fangelsisdóm og þarf að afplána að minnsta kosti tíu ár.
Mál Yasaman er það nýjasta í óhugnalegri stefnu íranskra stjórnvalda gegn baráttukonum fyrir mannréttindum. Fyrr á þessu ári hlautNasrin Sotoudeh 38 ára fangelsisdóm og 148 svipuhögg fyrir að verja konur sem einnig höfðu mótmælt umræddum lögum með friðsamlegum hætti.
Írönsk stjórnvöld mega ekki halda áfram grimmilegum kúgunaraðgerðum sínum.
Skrifaðu undir núna og kallaðu eftir því að íslensk stjórnvöld veki athygli á stöðu mannréttinda í Íran og krefjist aðgerða á alþjóðavettvangi!
