Fréttir
16. júní 2020Filippseyjar: Skýrsla SÞ í kjölfar ályktunar Íslands sýnir brýna þörf á alþjóðlegri rannsókn
Þann 4. júní síðastliðinn kom út skýrsla Sameinuðu þjóðanna um ástand mannréttinda á Filippseyjum. Þar er greint frá aftökum án dóms og laga ásamt öðrum mannréttindabrotum í nafni svokallaðs „stríðs gegn fíkniefnum“ sem Duterte forseti landsins stendur fyrir auk árása gegn fjölmiðlum, mannréttindafrömuðum og pólitískum aðgerðasinnum.
Í skýrslunni er einnig fjallað um refsileysi vegna aftaka án dóms og laga, falsanir á sönnunargögnum í áhlaupum lögreglu sem gerðar eru án heimildar, hvatningu frá æðstu embættum um að fremja morð í „stríðinu gegn fíkniefnum“, aðför að tjáningarfrelsinu og mannréttindabrot annarra aðila en yfirvalda.
Frumkvæði Íslands
Skýrslan var gefin út samkvæmt beiðni þess efnis í ályktun Mannréttindaráðs Sameinuðu þjóðanna sem samþykkt var 11. júlí 2019 vegna stöðu mannréttinda á Filippseyjum. Íslensk stjórnvöld áttu frumkvæði að ályktuninni og er hún sú fyrsta af þessari gerð sem er um Filippseyjar.
Ísland sýndi leiðtogafærni sína í verki með því að setja fram og koma í gegn ályktuninni. Amnesty International fagnaði ályktuninni en hún kom í kjölfar þrýstings ýmissa félagasamtaka, þeirra á meðal Amnesty International.
„Við vonumst til þess að fordæmi Íslands verði öðrum ríkjum hvatning og sýni að fámennari ríki geti látið til sín taka á alþjóðavettvangi og haft jákvæð áhrif á mannréttindi í heiminum. Hið svokallaða „stríð gegn fíkniefnum” birtist meðal annars í víðtækum og kerfisbundnum aftökum án dóms og laga á almennum borgurum sem oft tilheyra jaðarsettum hópum. Brotin viðgangast án þess að nokkur sé látinn sæta ábyrgð. Í skýrslu Sameinuðu þjóðanna kemur fram að yngsta fórnarlambið var fimm mánaða gamalt barn sem sýnir skýrt hversu andstyggileg og vægðarlaus þessi brot eru,“
segir Anna Lúðvíksdóttir, framkvæmdastjóri Íslandsdeildar Amnesty International.
Refsileysi
Frá upphafi stjórnar Duterte í júní 2016 hafa þúsundir einstaklinga, flestir fátækir úr jaðarhópum, verið myrtir af lögreglu eða óþekktum vopnuðum einstaklingum en sumir þeirra síðastnefndu tengjast lögreglunni.
Þrátt fyrir fordæmingu innlendra og erlendra mannréttindasamtaka og alþjóðasamfélagsins hefur Duterte forseti hvatt lögreglu til að fremja morð í formi aftaka án dóms og laga með afdráttarlausum hætti, lofað þeim friðhelgi og hækkað lögreglumenn um tign sem bregðast við hvatningunni.
Árásir gegn mannréttindafrömuðum og gagnrýnendum stjórnvalda hafa aukist í þessu umhverfi refsileysis. Nýlegt dæmi um óhóflega valdbeitingu stjórnvalda er þegar þau lokuðu einum stærsta sjónvarps- og útvarpsmiðli landsins og hótuðu að drepa þá einstaklinga sem brjóta gegn sóttkví og útgöngubanni í kórónuveirufaraldrinum.
Það hefur nánast enginn verið dreginn til ábyrgðar fyrir þessi alvarlegu brot og forseti landsins og annað háttsett embættisfólk hefur haldið áfram að hvetja lögreglu til morða. Refsileysi hefur skapað ótta hjá þolendum mannréttindabrota og öðrum einstaklingum sem benda á ástandið en lögregla og aðrir aðilar geta haldið áfram aftökum án dóms og laga án þess að sæta ábyrgð.
Ákall Amnesty International
„Skýrslan sýnir svart á hvítu hversu nauðsynlegt er að rannsaka þessi grimmilegu mannréttindabrot enn frekar og draga þá til ábyrgðar sem þau fremja. Ísland tók fyrsta skrefið og fékk þessa ályktun í gegn í Mannréttindaráðinu og nú verður að tryggja að alþjóðasamfélagið snúi bökum saman og tryggi að þessum drápum og öðrum mannréttindabrotum, sem framin eru undir því yfirskini að berjast gegn fíkniefnum, linni,“
segir Anna Lúðvíksdóttir framkvæmdastjóri Íslandsdeildar Amnesty International.
Ályktun Mannréttindaráðs Sameinuðu þjóðanna var mikilvægt fyrsta skref til að takast á við versnandi mannréttindaástand á Filippseyjum síðastliðin fjögur ár. Það er áríðandi að Mannréttindaráð Sameinuðu þjóðanna taki málið föstum tökum í ljósi alvarlegrar niðurstöðu þessarar skýrslu. Amnesty International kallar eftir óháðri alþjóðlegri rannsókn á aftökum án dóms og laga og öðrum brotum sem framin hafa verið frá árinu 2016 og að henni fylgi tilskipun um að stuðla að ábyrgðarskyldu.
Lestu einnig
ÞITT NAFN BJARGAR LÍFI
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu