Viðburðir
30. apríl 2024Heimildarmyndin Soviet Barbara og umræður í Bíó Paradís
Íslandsdeild Amnesty International heldur sérstaka sýningu á verðlaunaheimildarmyndinni Soviet Barbara í tilefni af herferð Amnesty International gegn rússneskum ritskoðunarlögum um hernað.
Sýningin fer fram í Bíó Paradís föstudaginn 3. maí kl. 19:00. Aðgangur er ókeypis. Öll Velkomin.
Ragnar Kjartansson og Masha Alyokhina úr Pussy Riot ávarpa gesti fyrir sýninguna og að henni lokinni ræða Gaukur Úlfarsson, leikstjóri myndarinnar, Guðni Tómasson, framleiðandi myndarinnar og Diana Burkot úr Pussy Riot við áhorfendur og svara spurningum.
Tjáningarfrelsið horfið
Diana Burkot úr fjöllistahópnum Pussy Riot segir miklar breytingar hafa átt sér stað í Rússlandi í kjölfar innrásarinnar í Úkraínu, þar á meðal ný ritskoðunarlög og kúgunartilburðir.
„Það er ekkert tjáningarfrelsi til staðar lengur í almannarými og jafnvel ekki í samtölum við vini og samstarfsfólk rétt eins og var á tímum Sovétríkjanna. Einnig er ekkert tjáningarfrelsi á samfélagsmiðlum.
Einstaklingur getur farið í fangelsi í allt að átta ár ef hann/hún/hán kallar stríð stríð en samkvæmt Kreml er þetta sérstök hernaðaraðgerð. Fólk getur átt á hættu að vera sótt til saka fyrir að tjá sig á samfélagsmiðlum og jafnvel fyrir að líka við færslur á samfélagsmiðlum. Nú þegar er mikið um slík mál. Instagram og Facebook eru skilgreind sem öfgafyrirtæki, femínismi og hinsegin hópar sem öfgahreyfingar, óháðir fjölmiðlar eru ekki lengur til.“
Diana Burkot úr fjöllistahópnum Pussy Riot
Kvikmyndin
Árið 1992, viku eftir fall Sovétríkjanna, varð sápuóperan Santa Barbara eins konar gluggi rússneskra sjónvarpsáhorfenda inn í vestræna lifnaðarhætti og naut gríðarlegra vinsælda.
Þrjátíu árum síðar færir íslenskur myndlistarmaður, Ragnar Kjartansson, Rússum þættina á ný.
Hér er hægt að horfa á stiklu úr heimildamyndinni Soviet Barbara.
Bakgrunnur
Um langa hríð hefur verið lítið svigrúm fyrir friðsamleg mótmæli og tjáningarfrelsi í Rússlandi en í kjölfar innrásar Rússa í Úkraínu hefur það í raun horfið með öllu. Viku eftir innrásina í Úkraínu, í febrúar 2022, innleiddu rússnesk stjórnvöld ritskoðunarlög í þeim tilgangi að gera mótmæli gegn innrásinni refsiverð. Nú, tveimur árum síðar, afplánar fjöldi fólks áralanga fangelsisdóma fyrir friðsamlegt andóf gegn stríðinu.
Íslandsdeild Amnesty International tekur nú þátt í alþjóðlegri herferð samtakanna til að vekja athygli á umræddum ritskoðunarlögum og þeim mannréttindabrotum sem af þeim hlýst í Rússlandi.
Við hvetjum alla til að taka þátt í herferðinni og skrifa undir ákall um að afnema ritskoðunarlögin í Rússlandi og frelsa fólk sem er í haldi á grundvelli þeirra. Minnum þannig valdhafa í Rússlandi á að ekki megi skerða tjáningarfrelsið og réttinn til friðsamlegra fundahalda.
Lestu einnig
ÞITT NAFN BJARGAR LÍFI
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu