Fréttir
7. september 2023Ísland: Afhending undirskrifta til utanríkisráðherra
Anna Lúðvíksdóttir framkvæmdastjóri Íslandsdeildar Amnesty International og Þórunn Pálína Jónsdóttir lögfræðingur deildarinnar afhentu Þórdísi Kolbrúnu Reykfjörð Gylfadóttur utanríkisráðherra ákall með 1109 undirskriftum þann 4. september.
Í ákallinu var vakin athygli á vinnu Sameinuðu þjóðanna við gerð alþjóðlegra staðla til að koma böndum á viðskipti með vörur sem hægt er að nota til pyndinga eða annarrar grimmilegrar, ómannúðlegrar eða vanvirðandi meðferðar eða refsingar. Amnesty International telur að þessi vinna hafi nú náð mikilvægum áfanga og nauðsynlegt sé að ríki taki þátt af einhug og þá sérstaklega þau ríki sem lýst hafa áður yfir stuðningi sínum við þetta framtak.
Amnesty International, sem á í samstarfi við rúmlega 30 frjáls félagasamtök um allan heim í þessum málaflokki, telur að gerð alþjóðlegs lagalega bindandi samnings sé skilvirkasta leiðin til að koma böndum á alþjóðleg viðskipti með löggæslubúnað sem er eða getur auðveldlega verið notaður til pyndinga eða annarrar illrar meðferðar. Í janúar 2023 komu öll samtökin saman til að styðja svokallaða Shoreditch-yfirlýsingu og hétu stuðningi við gerð öflugs pyndingalauss viðskiptasamnings.
Undirskriftum var safnað annars vegar í gegnum netákall deildarinnar og í aðgerð sem haldin var 26. júní, á alþjóðlegum degi til stuðnings þolendum pyndinga. Ungliðar Íslandsdeildar Amnesty International stóðu fyrir táknrænum gjörningi til að vekja athygli á ákalli um alþjóðlegan samning til að koma böndum á löggæsluvopn og á skiltum mátti sjá slagorð um að skaðaminni vopn væru ekki skaðlaus sem er vísun í skýrslu Amnesty International „My eye exploded”.
Mynd frá afhendingu undirskriftanna.
Tími til aðgerða
Amnesty International leggur ríka áherslu á að ríki styðji, með virkum hætti í milliríkjasamskiptum, tillögur um lagalega bindandi samning sem felur í sér stuðning við alla undirbúningsvinnu og samþykkt ályktunnar á allsherjarþingi Sameinuðu þjóðanna um stofnun sérfræðingahóps til að koma af stað samningaviðræðum um pyndingarlausan viðskiptasamning í samræmi við tilmæli frá sérfræðingahópi stjórnvalda.
Hvatti Íslandsdeild Amnesty International ráðherra til að taka þetta mál upp á fundum sem hún sækir á vegum svæðisbundinna stofnana og hvetja nágrannaríki til að styðja þetta framtak.
Mynd frá aðgerðinni á Austurvelli.
Samtal um önnur mál
Eftir afhendingu undirskrifta áttu fulltrúar Íslandsdeildar Amnesty International gott samtal við utanríkisráðherra og Helen Ingu S. von Ernst, sérfræðing á skrifstofu alþjóðapólitískra málefna.
Samtalið barst meðal annars að réttinum til hreins, heilnæms og sjálfbærs umhverfis og hvatti Íslandsdeild Amnesty International Ísland til að skila inn greinargerð til Alþjóðadómstólsins þar sem lögð yrðu fram rök byggð á mannréttindalögum til að setja á ríki lagalegar skyldur í tengslum við loftslagsbreytingar.
Einnig voru réttindi barna í Tælandi rædd en stjórnvöld þar í landi hafa orðið uppvís að grófum mannréttindabrotum gegn fjölda barna þar í landi sem hafa ekkert til saka unnið annað en að hafa nýtt sér rétt sinn til fundafrelsis og friðsamlegrar tjáningar í fjöldamótmælum sem hófust 2020. Íslandsdeildin hvatti ráðherra til að beita sér fyrir mannréttindamálum í viðræðum við tælensk stjórnvöld.
Að lokum var staða mannréttindamála í Íran rædd en í skýrslu Amnesty International sem var birt 21. ágúst 2023 er skýrt frá því hvernig írönsk yfirvöld handtaka fjölskyldur fórnarlamba og setja þær í varðhald að geðþótta, koma á grimmilegum takmörkunum á friðsamar samkomur við grafreiti og sjá til þess að legsteinar séu eyðilagðir.
Lestu einnig
ÞITT NAFN BJARGAR LÍFI
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu