Fréttir
21. ágúst 2019Íslandsheimsókn Kumi Naidoo aðalframkvæmdastjóra Amnesty International
Aðalframkvæmdarstjóri Amnesty International, Kumi Naidoo, var staddur hér á landi síðastliðinn föstudag fram til þriðjudags. Margt dreif á daga hans hér á Íslandi en síðastliðinn laugardag tók hann þátt í Reykjavík Pride með ungliðahreyfingu Íslandsdeildarinnar, var viðstaddur afhjúpunar minnisvarða um jökulinn Ok á sunnudaginn, hitti Guðlaug Þór Þórðarson utanríkisráðherra Íslands og stóð að lokum fyrir hádegisumræðum á skrifstofu Íslandsdeildarinnar á mánudaginn.
Kumi er reynslumikill aðgerðasinni og hefur frá unga aldri starfað í þágu mannréttinda í heimalandi sínu, Suður-Afríku. Aðeins 15 ára skipulagði hann sín fyrstu mótmæli gegn aðskilnaðarstefnunni og var rekinn úr skóla fyrir vikið. Eftir það tók hann virkan þátt í aðgerðum gegn aðskilnaðarstefnunni sem leiddu til þess að árið 1986, 21 árs að aldri, var Kumi neyddur í útlegð til Bretlands. Hann snéri ekki aftur til heimalands síns fyrr en árið 1990, eftir að Nelson Mandela var leystur úr haldi.
Áður en Kumi tók til starfa hjá Amnesty International, fyrir ári síðan, gegndi hann starfi aðalframkvæmdastjóra Greenpeace International. Aðgerðasinninn Kumi var á þeim tíma meðal annars handtekinn fyrir að klifra upp á olíuborpall á Grænlandi árið 2011 en þar afhenti hann undirskriftarlista gegn olíuborun í Atlantshafi.
Kumi tók þátt í Reykjavík Pride síðastliðinn laugardag ásamt ungliðahreyfingu Íslandsdeildarinnar. Fyrir gönguna spjallaði Kumi við ungliða. Hann lagði áherslu á mikilvægi ungra aðgerðasinna og hvatti hreyfinguna til að halda ótrauð áfram. Hann lagði áherslu á mikilvægi þess að gleyma ekki að hafa húmor fyrir hlutunum og skemmta sér þegar barist er fyrir mannréttindum.
Kumi deildi sögu frá fyrstu mótmælagöngu sinni þegar hann mótmælti ójöfnuði hvítra og svartra innan menntakerfisins í Suður-Afríku og hrópaði fremstur í flokki „We want equality“ (Við viljum jafnrétti). Þegar orðin bárust til enda fylkingarinnar höfðu skilaboðin aðeins skolast til og kallað var „we want colour tv“ (Við viljum litasjónvarp).
„Á þessum árum langaði mig líklegast jafn mikið í jafnrétti og litasjónvarp,“ sagði hann hlæjandi en á þeim tíma var það fjarlægur draumur fyrir svartan strák í Suður-Afríku.
Á mánudaginn hitti Kumi síðan Guðlaug Þór Þórðarson utanríkisráðherra ásamt Björgu Maríu Oddsdóttur formanni Íslandsdeildar Amnesty International og Önnu Lúðvíksdóttur framkvæmdastjóra deildarinnar. Rætt var um setu Íslands í mannréttindaráði Sameinuðu þjóðanna og þakkaði Kumi Íslandi fyrir að leggja fram ályktun í ráðinu í júlí síðastliðnum sem varðaði ástand mannréttindamála á Filippseyjum. Íslensk stjórnvöld sýndu þar forystu í verki.
Þá hvatti Kumi íslensk stjórnvöld til að halda áfram gagnrýni sinni í ráðinu á mannréttindaástandið í Sádi-Arabíu. Amnesty International kallar eftir því að mannréttindaráðið leggi fram ályktun um stöðu mannréttinda í Sádí-Arabíu sem feli meðal annars í sér að komið verði á fót sérstöku eftirlitskerfi til að fylgjast með mannréttindabrotum í landinu.
Þá voru loftslagsmál og hlýnun jarðar einnig rædd á fundinum.
Kumi hitti einnig félaga Íslandsdeildar Amnesty International en deildin stóð fyrir hádegisumræðum um helstu áskoranir í baráttunni fyrir mannréttindum allra. Kumi nefndi nokkrar helstu áskoranirnar, þá allra helst uppgang einræðisstjórnarfars víðsvegar um heiminn, aukinn ójöfnuð ríkra og fátækra, útbreiðslu útlendingarhaturs í heiminum og hlýnun jarðar. Mikilvægt sé að við tengjum loftslagsmál við mannréttindi þar sem minnihlutahópar og fólk í þróunarlöndum verða mest fyrir barðinu á afleiðingum þess.
„Góðu fréttirnar varðandi hlýnun jarðar er að jörðin þarfnast ekki björgunar. Jörðin hefur það ágætt. Hvers vegna segi ég það? Jú, því ef við höldum áfram á þeirri braut sem við erum á þá er lokaútkoman sú að mannkynið deyr út. Jörðin mun hins vegar ná sér aftur á strik. Skógar munu vaxa aftur og vatnslindir endurnýjast. Vandinn sem tengist hlýnun jarðar snýr fyrst og fremst um að tryggja framtíð barna og barnabarna okkar.“
Kumi Naidoo, aðalframkvæmdastjóri Amnesty International
Lestu einnig
ÞITT NAFN BJARGAR LÍFI
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu