SMS
15. nóvember 2018Aasia Noreen, kölluð Aasia Bibi, er kristinnar trúar og starfaði á sveitabýli. Árið 2010 var hún fundin sek um guðlast og dæmd til dauða. Þrátt fyrir að hafa verið sýknuð af öllum ákæruliðum í hæstarétti létu pakistönsk yfirvöld undan kröfum vígasveita um að senda málið til hæstaréttar að nýju og banna Aasiu Bibi að ferðast úr landi.
Aasia Bibi er 54 ára gömul fimm barna móðir. Síðustu átta árum hefur hún eytt á dauðadeild og bíður áfrýjunar dóms síns. Það var í nóvember 2010 sem hún var dæmd til dauða fyrir guðlast en hún var sökuð um að hafa móðgað Múhameð spámann með því að bjóða samstarfsmanni sínum vatnsglas. Samstarfsmaðurinn brást ókvæða við vegna þess að glasið væri „óhreint“ vegna trúarskoðana Aasiu Bibi. Kristnir Pakistanar í Punjab, þaðan sem Aasia Bibi er ættuð, eru fórnarlömb trúarlegrar mismununar og vegna uppruna síns sem Dalíti en Dalítar eru erfðastétt sem áður fyrr var álitin „óhrein“.
Þann 31. október síðastliðinn, þremur árum eftir að hæstiréttur samþykkti að taka áfrýjun Aasiu Bibi til skoðunar, var hún sýknuð af öllum ákæruliðum á grundvelli ónógra sönnunargagna. Eftir að dómur var upp kveðinn brutust út ofbeldisfull mótmæli í stærstu borgum Pakistans þar sem vígasveitir settu upp vegahindranir og kveiktu í ökutækjum. Forsætisráðherra landsins, Imran Khan, kom fram í sjónvarpsviðtali til að verja dómsúrskurðinn og fordæma ofbeldið. Eftir að mótmælin höfðu staðið yfir í tvo daga létu stjórnvöld undan.
Fulltrúar stjórnvalda hófu samningaviðræður við leiðtoga vígasveitarinnar Tehreek-e-Labbayk sem leiddi mótmælin og féllust á að nafn Aasiu Bibi yrði sett á lista þeirra sem mega ekki fara úr landi og að hæstiréttur tæki fyrir áskorun um að snúa við sýknudóminum. Aasia Bibi situr enn í fangelsi og bíður úrskurðs hæstaréttar.
Líf Aasiu Bibi og fjölskyldu hennar er í mikill hættu þar sem þeim er stöðugt ógnað. Aðrir fangar hafa ráðist á Aasiu Bibi í fangelsinu og ef hæstiréttur snýr sýknudómnum við á hún yfir höfði sér dauðadóm. Ef hún verður látin laus munu vígasveitirnar ógna lífi hennar og koma í veg fyrir að hún geti flúið land.
Sms-félagar krefjast þess að hæstiréttur í Pakistan standi við sýknudóm sinn og sjái til þess að Aasia Bibi verði tafarlaust leyst úr haldi, að hún og fjölskylda hennar hljóti vernd til að komast úr landi og eigi kost á að sækja um alþjóðlega vernd. Einnig krefjumst við þess að dómarar hæstaréttar og aðrir embættismenn hljóti vernd gegn ógnum og ofbeldi vígasveita og að lög er varða guðlast og mismunun minnihlutahópa verði afnumin.
Skráðu þig í sms-aðgerðanetið hér.
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu