Fréttir
13. febrúar 2020Stórkostlegur árangur í Þitt nafn bjargar lífi 2019
Árangur í árlegri herferð Amnesty Þitt nafn bjargar lífi fór fram úr björtustu vonum Íslandsdeildar Amnesty International árið 2019 en þá voru tekin fyrir tíu mál ungmenna víðs vegar um heiminn sem öll sættu svívirðilegum mannréttindabrotum, allt frá lögregluofbeldi til dauðarefsingar.
Alls söfnuðust 86.886 undirskriftir á vefsíðu deildarinnar, á aðgerðakort og í sms-aðgerðanetinu. Þetta er rúmlega 21% aukning frá árinu 2018 eða 15.181 fleiri undirskriftir. Þá voru hundruð stuðningskveðja sendar til þolenda mannréttindabrota og fjölskyldna þeirra til að styrkja þau í baráttunni og auka með þeim von um að réttlætið nái fram að ganga.
Einnig varð 25 % fjölgun á söfnun undirskrifta á prentuð aðgerðakort á milli ára. Flestar undirskriftir á kort auk stuðningskveðja söfnuðust á Egilsstöðum eða 1624 og á Akureyri söfnuðust 907 undirskriftir og kveðjur.
Gífurleg aukning var í þátttöku grunnskólanema en alls skráðu 19 grunnskólar sig í keppni um titilinn Mannréttindagrunnskóli ársins í Þitt nafn bjargar lífi. Alls söfnuðust 4343 undirskriftir sem er 73% aukning frá fyrra ári.
Aldrei fyrr hafa jafn margir staðir á landinu verið skráðir til þátttöku í Þitt nafn bjargar lífi eins og á síðasta ári en einstaklingar og starfsfólk bókasafna á rúmlega 30 stöðum um land allt stóðu fyrir viðburðum til að vekja athygli á tíu málum þolenda mannréttindabrota og söfnuðu undirskriftum í þeirra þágu.
Við sem störfum fyrir hönd samtakanna erum djúpt snortin yfir þeirri samstöðu og samhug sem Íslendingar sýndu á síðasta ári í baráttunni fyrir betri heimi þar sem allir fá notið réttlætis, mannréttinda og mannlegrar reisnar.
Undirskriftir ykkar, stuðningskveðjur og aðgerðir skipta öllu máli. Hér má sjá myndband sem Amnesty-deildin í Brasilíu deildi nýverið með samtökunum og sýnir fjölskyldu Marielle og fyrrum sambýliskonu hennar taka á móti rúmlega 30.000 stuðningskveðjum frá fólki víðs vegar að úr heiminum, m.a. Íslandi. Mál Marielle Franco var tekið fyrir í Þitt nafn bjargar lífi árið 2018 en hún barðist fyrir réttlátari og öruggari Rio de Janeiro og var vinsæll borgarfulltrúi. Hún ólst upp í fátækrahverfi og studdi ávallt réttindi svartra kvenna, hinsegin fólks og ungs fólks. Hún fordæmdi að auki morð af hálfu lögreglu í Brasilíu. Þann 14. mars 2018 var Mariella skotin til bana í bíl sínum. Sönnunargögn benda til þess að morðið hafi verið framið af færum atvinnumanni með byssukúlum frá brasilísku ríkislögreglunni. Hér má lesa um framfarir í rannsókninni á máli Marielle.
Lestu einnig
ÞITT NAFN BJARGAR LÍFI
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu