Fréttir
3. nóvember 2023Hin árlega og alþjóðlega herferð, Þitt nafn bjargar lífi, hefur svo sannarlega sýnt að hægt er að umbreyta lífi þolenda mannréttindabrota með þeim einfalda hætti að setja nafn sitt á bréf til stjórnvalda og krefjast umbóta í máli þeirra.
Allt frá upphafi herferðarinnar árið 2001 hafa rúmlega hundrað þolendur grófra mannréttindabrota fengið úrbætur á málum sínum. Undirskriftir til stjórnvalda sem fótum troða mannréttindi hafa því oft skipt sköpum í lífi þolenda og gefið öðrum von á erfiðum tímum sem er ekki síður mikilvægt. Hér er hægt er að skrifa undir málin í ár.
Góð frétt frá Simbabve
„Mér er svo létt og ég þakka ykkur fyrir stórkostlega herferð. Ég stend í ævarandi þakkarskuld við ykkur. Það er sem þungri byrði hafi verið létt af herðum mér. Mér leið eins og ég væri svo elskuð og mikils metin þegar ég las öll bréfin og kortin.“
Þannig hljóma þakkarorð Cecilliu Chimbiri frá Simbabve. Aðgerðasinnar um heim allan létu sig mál hennar og vinkvennanna, Joanah Mamombe og Netsai Marova, varða á síðasta ári í herferðinni Þitt nafn bjargar lífi. Í kjölfar þátttöku þeirra í mótmælum árið 2020 voru þær handteknar og numdar á brott þar sem þær voru barðar og beittar kynferðisofbeldi af hálfu yfirvalda. Þær þurftu að dvelja á spítala vegna alvarlegra áverka. Á meðan þær dvöldu á spítalanum voru þær handteknar og ákærðar fyrir mótmæli og að sviðsetja raunir sínar. Cecillia og Joanah voru sýknaðar í hæstarétti þann 4. júlí síðastliðinn en mál Netsai fór ekki fyrir dómstóla þar sem hún flúði land.
Samtakamáttur til sigurs
Samtakamátturinn skiptir máli. Fólk á Íslandi hefur heldur betur lagt sitt lóð á vogarskálarnar með góðri þátttöku í herferðinni, Þitt nafn bjargar lífi. Íslandsdeild Amnesty International er afar þakklát öllum þeim fjölmörgu Íslendingum sem lagt hafa þessari stærstu mannréttindaherferð í heimi lið síðustu ár á aðventunni. Þátttakan hefur skipt sköpum enda eru fáar þjóðir sem sýna herferðinni jafn mikinn stuðning og Ísland en nærri 3% þjóðarinnar hafa oftar en ekki gripið til aðgerða á hverju ári. Það er mun hærra hlutfall íbúa en nokkur staðar í heiminum.
Gerum Þitt nafn bjargar lífi árið 2023 enn áhrifameira í þágu einstaklinga í tíu málum sem eiga það flestir sameiginlegt að hafa glatað frelsi sínu með einum eða öðrum hætti.
Þau hafa öll sætt mannréttindabrotum af hálfu stjórnvalda, lögreglu eða stórfyrirtækja fyrir það eitt hver þau eru og hverju þau berjast fyrir.
Málin í ár
Frelsi fólks til að tala gegn óréttlæti og mismunun er ógnað í fjölmörgum löndum. Í Brasilíu hefur Ana Maria Santos barist fyrir réttlæti í máli sonar síns Pedro Henrique. Lögreglumenn eru grunaðir um að hafa myrt hann í desember 2018 en ítarleg rannsókn á morðinu og réttarhöld hafa enn ekki farið fram.
Pedro var sjálfur aðgerðasinni og talsmaður kynþáttaréttlætis og mannréttinda í Brasilíu. Móðir hans hefur sýnt ótrúlegt hugrekki í baráttunni sinni gegn refsileysi innan lögreglunnar þrátt fyrir lögsóknir á hendur sér, ógnanir og áreitni af hálfu yfirvalda.
Ahmed Mansoor frá Sameinuðu arabísku furstadæmunum var einn fárra sem eftir var í landinu sem þorði að segja sannleikann um stöðu mannréttindamála í landinu. Hann vakti reglulega máls á pyndingum, varðhaldi og óréttlátum réttarhöldum yfir einstaklingum einstaklingum sem gagnrýna stjórnvöld.
Nú er hann einn af gagnrýnendum stjórnvalda sem sitja í fangelsi. Árið 2018 hlaut hann tíu ára fangelsisdóm fyrir að „móðga Sameinuðu arabísku furstadæmin og táknmyndir þeirra“.
Löggjöf um þungunarrof í Póllandi er með þeim ströngustu í Evrópu og er aðeins leyft í algjörum undantekningartilfellum. Kvenréttindafrömuðurinn Justyna Wydrzyńska fann sig knúna til að aðstoða konu í ofbeldissambandi við þungunarrof en slík aðstoð er refsiverð í Póllandi. Í mars 2022 var Justyna fundin sek um að „aðstoða við þungunarrof“ og dæmd til átta mánaða samfélagsþjónstu. Sakfelling hennar setur hættulegt fordæmi í Póllandi og gerir aðgengi að öruggu þungunarrofi enn torveldara.
Þetta eru aðeins þrjú þeirra tíu mála í herferðinni í ár. Við hvetjum þig til að styðja við málin með undirskrift þinni. Það tekur aðeins örskamma stund að skrifa undir á vefsíðu okkar. Í krafti fjöldans náum við árangri. Þitt nafn getur bjargað lífi.
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu