Fréttir
25. september 2014Amnesty International gaf nýverið út skýrslu sem ber heitið On the Brink of Death: Violence Against Women and the Abortion Ban in El Salvador. Meginniðurstaða skýrslunnar er sú að á hverju ári er brotið á mannréttindum hundraða kvenna og stúlkna í El Salvador fyrir tilstuðlan fortakslauss banns við fóstureyðingum sem bundið var í landslög árið 1998.
Blátt bann við fóstureyðingum þýðir að konur og stúlkur eru saknæmar í öllum tilvikum leiti þær slíkrar aðgerðar, jafnvel þótt lífi eða heilsu þeirra er ógnað, þungun er afleiðing nauðgunar eða sifjaspells eða fóstrið ekki lífvænlegt.
Kona sem er í lífshættu á meðgöngu stendur því frammi fyrir tveimur óhugsandi valmöguleikum: fangelsi til lengri tíma leiti hún sér fóstureyðingar eða dauða aðhafist hún ekkert. Samkvæmt fóstureyðingarbanninu geta konur og stúlkur sem fundnar eru sekar um að binda enda á meðgönguna, hlotið tveggja til átta ára fangelsisdóm og allt að fimmtíu ára dóm ef þær eru ákærðar fyrir manndráp. Sakfellingin er oft byggð á ófullnægjandi eða ótraustum sönnunargögnum sem lögð eru fram í meingölluðum réttarhöldum. Heilbrigðisstarfsfólk sem aðstoðar við eða framkvæmdir fóstureyðingu er einnig sakhæft. Jafnvel konur sem verða fyrir fósturmissi kunna að vera ákærðar fyrir morð, handteknar og fangelsaðar í áratugi, þar sem grunur leikur á að þær hafi leitað sér ólöglegrar fóstureyðingar.
Samkvæmt skýrslu Amnesty International voru 129 konur handteknar í El Salvador, frá janúar 2000 til apríl 2011, í kjölfar fóstursmissis eða ólöglegrar fóstureyðingar, flestar á aldrinum 18 til 25 ára. Konur og stúlkur í El Salvador sem eru sakfelldar vegna fósturmissis eða ólöglegrar fóstureyðingar eru yfirleitt hinar efnaminni sem treysta á opinbera heilbrigðisgeirann og lagalega þjónustu. Fósturmissir er ekki glæpur samkvæmt lögum í El Salvador en engu að síður eru konur síendurtekið fangelsaðar á grundvelli ólöglegrar fóstureyðingar eða manndráps, jafnvel þótt öll sönnunargögn bendi til fósturmissis.
Þetta var tilfellið í máli Maríu Teresu Rivera sem afplánar 40 ára fangelsisdóm fyrir fósturmissi. María Teresa sem átti fyrir fimm ára barn vissi ekki að hún bæri annað barn undir belti fyrr enn hún veiktist í fataverksmiðju þar sem hún starfaði. Tengdamóðir hennar kom að henni á baðherbergi í verksmiðjunni þar sem hún lá á gólfinu í blóði sínu og kom henni undir læknishendur með hraði. Þegar á spítalann var komið tilkynnti heilbrigðisstarfsmaður hana til lögreglu. Skömmu síðar mætti lögreglumaður á spítalann og tók að yfirheyra Maríu Teresu, hálf meðvitundarlausa, án þess að lögfræðingur væri viðstaddur. Í júlí árið 2012 kom hún fyrir rétt og var fundin sek um manndráp að yfirlögðu ráði, þrátt fyrir alvarlega misbresti á sönnunargögnum gegn henni. Sonur hennar verður 45 ára gamall þegar María Teresa verður leyst úr haldi.
Tíu ára fórnarlamb nauðgunar neydd til að fæða barn!
Fortakslaust bann við fóstureyðingum í El Salvador er eitt form ríkisofbeldis gegn konum og stúlkum og jafngildir pyndingum og annarri illri meðferð, samkvæmt ályktun sérstaks eftirlitsfulltrúa Sameinuðu þjóðanna um pyndingar.
Bannið undanskilur ekki einu sinni barnungar stúlkur sem verða þungaðar í kjölfar nauðgunar. Lögin neyða allar konur og stúlkur, óháð aldri, til að ganga fulla meðgöngu jafnvel þótt slíkt hafi gjöreyðandi áhrif á andlega og líkamlega velferð þeirra. Læknir sem meðhöndlaði tíu ára gamla þungaða stúlku sem sætt hafði nauðgun sagði Amnesty International eftirfarandi:
„Við þurftum að meðhöndla níu ára gamla stúlku sem var þunguð og ól barn aðeins tíu ára. Hún hafði sætt kynferðislegri misnoktun frá því hún var kornabarn. Hún varð ólétt. Þetta var hrikalega erfitt mál… það endaði með keisaraskurði á 32 viku meðgöngu. Þetta tilfelli setti mark sitt á okkur öll kannski vegna þess að hún skildi ekki hvað var að koma fyrir hana. hún bað okkur um liti, Crayon liti og hóf að teikna mynd af okkur öllum og hengdi upp á spítalavegginn. Hjarta okkar sökk af sorg. Hún er bara lítið barn, lítið barn! Hún skildi ekki að hún ætti sjálf von á barni.“
Stúlkan var neydd til ganga fulla meðgöngu.
Með því að neita konum og stúlkum aðgang að öruggum og löglegum fóstureyðingum, brýtur ríkið gróflega á mannréttindum þeirra og stefnir lífi þeirra í hættu.
Hið ómannúðlega, fortakslausa bann við fóstureyðingum í El Salvador leiðir til dauða hundraða kvenna og stúlkna í El Salvador á ári hverju og leggur líf enn fleiri í rúst. Samkvæmt Alþjóðaheilbrigðismálastofnuninni lætur 11% stúlkna og kvenna lífið í kjölfar ólöglegra fóstureyðinga í El Salvador og 57% allra dauðsfalla hjá þunguðum unglingsstúlkum á aldrinum 16-19 ára orsakast af sjálfsvígi.
Rannsóknir Amnesty International benda til þess að stjórnvöld í El Salvador bera ábyrgð á brotum á grundvallar mannréttindum: réttinum til lífs, réttinum til að lifa frjáls frá pyndingum og annarri illri meðferð, réttinum til einkalífs, réttinum til heilbrigðis, réttinum til að ákveða hvort og hvenær þú eignast barn og fjölda barna og réttinum til að lifa án mismununar.
Þessi miskunarlausa löggjöf gegn fóstureyðingum endurspeglar rótgróin viðhorf í samfélaginu um „viðeigandi“ hlutverk kvenna sem einskorðast við hlutverk eiginkonu og móður. Afturhaldssamar staðalímyndir um konur og mismunun í þeirra garð gegnsýrir allt samfélagið og rænir þær réttinum til ákvarðana um eigið líf og líkama. Ríkisvaldið ýtir síðan undir ójöfnuð og styrkir mismunun í garð kvenna, bæði með aðgerðum sínum og aðgerðaleysi.
Engin heildstæð kynfræðsla er til að mynda veitt í El Salvador eða fræðsla um náin sambönd og erfitt er að nálgast getnaðarvarnir. Þetta hefur leitt til þess að í El Salvador er hlutfall þungaðra unglingsstúlkna einna hæst meðal allra landa í Suður-Ameríku. Þá er horft framhjá kynbundnu ofbeldi og morðum á konum sem er landlægt vandamál, þrátt fyrir að ný löggjöf gegn ofbeldi á konum hafi tekið gildi árið 2012. Þar sem lögin virka ekki í reynd eru konur og stúlkur enn mjög berskjaldaðar fyrir ofbeldi af ýmsu tagi.
Alba er 25 ára gömul kona sem býr á strjálbýlum stað í El Salvador. Saga hennar er skýrt dæmi um það hvernig mismunun í garð kvenna innan dómskerfisins hindrar konur í að fá réttvísinni framgengt. Hún tjáði Amnesty International í september 2013 að hún hafi sætt líkamlegu og andlegu ofbeldi af hálfu maka síns í mörg ár en með þeim tóku kynni þegar hún var aðeins 14 ára. Þegar henni var loks fært að leggja fram kæru um heimilsofbeldi tjáði dómari í málinu henni að þar sem hún sýndi engin merki um líkamlega áverka samanber marbletti og kærði ekki ofbeldið samstundis gæti hann ekki tekið málið upp. Að sögn sendi dómarinn þess í stað Ölbu og mann hennar í ráðgjöf fyrir foreldra!
Heimurinn getur ekki setið auðum höndum og horft á konur og stúlkur í El Salvador þjást og láta lífið í hundraðatali.
Amnesty International krefur stjórnvöld í El Salvador um að:
1. Afglæpavæða fóstureyðingar með því að nema úr gildi öll refsiákvæði gegn konum og stúlkum sem leita fóstureyðingar og jafnframt þau refsiákvæði sem beinast gegn heilbrigðisstarfsfólki og öðrum sem framkvæma fóstureyðingar eða aðstoða konur og stúlkur við að verða sér úti um slíka þjónustu að gefnu samþykki.
2. Leysa allar konur og stúlkur sem hafa leitað fóstureyðingar eða misst fóstur, tafarlaust og skilyrðislaust úr haldi, þeirra á meðal konur og stúlkur sem hafa hlotið dóm fyrir morð af yfirlögðu ráði og manndráp.
3. Tryggja aðgengi að öruggum og löglegum fóstureyðingum fyrir allar konur og stúlkur að minnsta kosti í þeim tilvikum þegar þungun stofnar lífi eða heilsu konu eða stúlku í hættu, þegar ljóst er að utanlegs fóstur getur ekki lifað af og þegar þungun er afleiðing nauðgunar eða sifjaspells.
4. Tryggja aðgengi að upplýsingum um getnaðarvarnir og þjónustu og veita heildstæða kynfræðslu.
5. Innleiða að fullu löggjöf frá 2012 sem ætlað er að vernda konur gegn ofbeldi (2012 Special Integral Law for the Life Free from Violence for Women).
Hér má lesa skýrslu Amnesty International.
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu