Skýrslur
27. október 2021Samkvæmt skýrslu Amnesty International, “It will be too late to help us once we are dead”, sem kom út í dag hefur loftslagsvá í heiminum leitt til einna verstu þurrka í sögu Madagaskar. Hungur eykst og um 1 milljón einstaklinga eru nú á barmi hungursneyðar þar í landi.
Ástandið í Madagaskar sýnir að loftslagsvá hefur nú þegar valdið miklum þjáningum og dauðsföllum. Skýrslan greinir frá því hvernig þurrkar hafa áhrif á mannréttindi fólks í suðurhluta Madagaskar þar sem 91% íbúa lifa undir fátækarmörkum.
Fjórir samfelldir þurrkar sem herjað hafa á suðurhluta Madagaskar hafa leitt til uppskerubrests og þar með hindrað að fólk fái mat. Síðustu þurrkar herjuðu frá nóvember 2020 til janúar 2021. Þurrkarnir leiddu til hungursneyðar, vannæringar og dauðsfalla.
Amnesty International hvetur alþjóðasamfélagið til að grípa strax til aðgerða og vernda fólk í löndum eins og Madagaskar sem eru nú þegar að finna fyrir afleiðingum loftslagsbreytinga.
Lestu skýrsluna hér.
„Madagaskar er í framlínu loftslagsváarinnar. Fyrir milljón einstaklinga hefur það þýtt ofsaþurrkar og brot á réttinum til lífs, heilsu, matar og vatns. Það gæti einnig leitt til hungurdauða. Þetta er að gerast núna. Núverandi spár um loftslagsbreytingar benda til þess að þurrkar eigi eftir að versna og að fólk í þróunarlöndum finni mest fyrir afleiðingunum. Í ljósi þess að loftslagsviðræður Sameinuðu þjóðanna á COP26 ráðstefnunni eru framundan er tími til kominn að leiðtogar heims hætti að draga lappirnar í loftslagsmálum.“
Agnès Callamard, aðalframkvæmdastjóri Amnesty International.
Amnesty International krefst þess einnig að leiðtogar heims grípi til sameiginlegra aðgerða af áræðni og festu í samræmi við vísindalega nálgun til að draga úr kolefnislosun fyrir árið 2030 um a.m.k. 45% miðað við árið 2010 og að kolefnislosun verði engin árið 2050.
Madagaskar er á meðal þeirra landa sem eru hvað allra viðkvæmust fyrir loftslagsvánni. Vísindaleg gögn sýna að loftslagsvá hefur að öllum líkindum leitt til hærra hitastigs og minnkandi úrkomu í suðurhluta landsins, þar sem úrkoma hefur verið undir meðallagi fimm ár í röð.
Umfang þurrkana
Sameinuðu þjóðirnar segja að Madagaskar sé á barmi þess að upplifa fyrstu hungursneyð heimsins af völdum loftslagsbreytinga.
„Alþjóðasamfélagið þarf umsvifalaust að veita fólkinu í Madagaskar aukna mannúðaraðstoð og aukafjárveitingu vegna tjóns af völdum þurrkana. Ríkari lönd og ríki sem hafa átt mestan þátt í að valda loftslagsbreytingum verða héðan í frá að veita fólki í Madagaskar aukinn fjárhagslegan og tæknilegan stuðning til að takast á við afleiðingar loftlagsbreytinga, þar á meðal alvarlega og langvarandi þurrka.“
Agnès Callamard.
Samkvæmt Matvælaáætlun (WFP) og Matvæla- og landbúnaðarstofnun (FAO) Sameinuðu þjóðanna býr í kringum 1,14 milljón einstaklinga við fæðuóöryggi í suðurhluta landsins.
Amnesty International tók viðtöl við einstaklinga í suðurhluta Madagaskar sem greindu frá hungurdauða í samfélögum sínum:
Í mars greindi Votsora, bóndi á sextugsaldri, frá því að tíu einstaklingar hefðu látist af völdum hungurs mánuði fyrr í þorpinu hans og þar af fimm á sama heimili á einum degi.
Ein kona greindi frá því að hún hafi misst tvö börn úr hungurdauða. „Þau þjáðust af hungri og þau dóu. Við borðum varla neitt.“
Annar maður sagði frá því að hann hafi misst tvö kornabörn: „Þau voru 14 mánaða og átta mánaða. Þau dóu fyrir ári síðan því við fengum ekkert að borða.
Áhrif á mannréttindi
Þurrkarnir í suðurhluta Madagaskar ógna réttinum til lífs og öðrum réttindum, eins og réttinum til heilsu, vatns, hreinlætis og matar. Þar af leiðandi hefur margt fólk ekki átt annarra kosta völ en að flytjast til annarra svæða í leit að mat.
„Við getum ekki lengur látið það líðast að fátækustu og jaðarsettustu hópar samfélagsins séu þeir sem kveljast hvað mest vegna gjörða og mistaka þeirra aðila sem losa mestan koltvísýring í heiminum.“
Agnès Callamard.
Börn eru rænd framtíð sinni þar sem hungur neyðir þau til að hætta í skóla og leita sér vinnu til að framfleyta fjölskyldu sinni. Foreldrar eru líka tregir við að senda börn í skóla á tóman maga. Ástandið leiðir til þyngri byrði á konur og heimili á þeirra ábyrgð þar sem þau reiða sig aðallega á landbúnað.
Það sem er enn verra er að við getum búist við því að þurrkarnir verði enn þungbærari í þessum landshluta Madagaskar, sem leiðir til þess að staða mannréttinda heldur áfram að hríðversna. Alþjóðasamfélagið verður að grípa til aðgerða og tryggja að fólk geti notið réttar síns til hreins, heilnæms og sjálfbærs umhverfis, sem er nauðsynleg undirstaða annarra réttinda.
Í ljósi loftlagsráðstefnunnar COP26 kallar Amnesty International eftir því að ríki heims:
Amnesty International kalla auk þess eftir því að ríkari lönd auki verulega fjárframlög sín til aðgerða sem draga úr losun með þeim hætti að mannréttindi séu höfð að leiðarljósi og aðstoða fátækari ríki að takast á við breyttar aðstæður vegna loftslagsbreytinga.
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu