Fréttir
28. maí 2021Í tilefni af 60 ára afmæli Amnesty International, í dag föstudaginn 28. maí, fagnaði Íslandsdeildin stóra deginum í Pósthússtræti við Austurvöll. Anna Lúðvíksdóttir, framkvæmdastjóri Íslandsdeildar samtakanna, hélt stutta ræðu og opnaði útisýningu um sögu og mannréttindasigra samtakanna síðustu 60 ára í máli og myndum. Þá veitti Claudia Ashanie Wilson viðurkenninguna „Aðgerðasinni Amnesty International“ fyrir hönd stjórnar Íslandsdeildar Amnesty International.
Upphaf Amnesty International er sönnun þess að oft þarf bara einn einstakling til að hefja alheimshreyfingu í þágu mannréttinda. Peter Benenson, breskur lögfræðingur, fékk birta grein eftir sig þann 28. maí 1961 í dagblaðinu Observer þar sem hann kallaði eftir því að fólk gripi til aðgerða fyrir einstaklinga sem væru í fangelsi fyrir skoðanir sínar. Þessi dagur markar upphaf Amnesty International þar sem ákall hans snerti við fólki sem sameinaðist í baráttunni fyrir réttlæti og frelsi og úr varð alþjóðahreyfing.
Aðgerðasinni Amnesty International
Íslandsdeildin vildi nota tækifærið og fagna þessum stóra áfanga með því að heiðra einstakling sem hefur barist fyrir mannréttindum af krafti og eljusemi með aðgerðum sínum. Leitað var til almennings um tilnefningar fyrir „Aðgerðasinna Amnesty International “ við góðar undirtektir þar sem fjölmargar tilnefningar bárust. Greinilegt er að margt baráttufólk fyrir mannréttindum má finna hér á landi.
Íslandsdeild Amnesty International telur mikilvægt að gefa kraftmiklu og frambærilegu fólki meðbyr og hvatningu í aðgerðum sínum í þágu mannréttinda. Með þessari viðurkenningu vill Íslandsdeildin fagna baráttufólki og hvetja þá aðgerðasinna til dáða sem berjast fyrir réttlátari heimi.
Stjórn Íslandsdeildar Amnesty International veitti Sveini Rúnari Haukssyni þennan heiðurstitil en hann hefur frá unga aldri verið öflugur málsvari mannréttinda. Sveinn Rúnar hefur verið framarlega í baráttunni fyrir mannréttindamiðaðri nálgun í geðheilbrigðismálum. Hann sat rúman áratug í stjórn Geðhjálpar og hefur kallað eftir mannúðlegri aðferðum í geðheilbrigðisþjónustu í stað nauðungarvistunar og sjálfræðissviptingar. Sveinn Rúnar var að auki formaður Félagsins Ísland-Palestína til fjölda ára. Sem formaður var hann öflugur í að ná athygli almennings á stöðu mála í Palestínu með greinaskrifum og friðsamlegum aðgerðum ásamt því að fræða og þrýsta á íslensk stjórnvöld að standa vaktina þegar kemur að mannréttindum þar í landi. Sveinn Rúnar er hvergi nærri hættur og berst enn þrotlaust fyrir mannréttindum þeirra sem þurfa á málsvara að halda.
Útisýning
Á útisýningunni er litið yfir sögu og sigra Amnesty International, stærstu mannréttindasamtaka í heimi í máli og myndum og stendur hún fram eftir sumri. Á meðal sigra er mál Moses Akatugba. Hann var aðeins 16 ára þegar hann var handtekinn í Nígeríu fyrir stuld á farsímum. Hann var pyndaður, hlaut óréttláta málsmeðferð og var að lokum dæmdur til dauða. Í kjölfar þess að 800.000 einstaklingar um heim allan skrifuðu undir bréf til stjórnvalda í Nígeríu og þrýstu á um lausn hans var Moses loks náðaður árið 2015 eftir tíu ár í fangelsi.
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu