Hin árlega herferð Þitt nafn bjargar lífi gekk fremur vel árið 2025 en samtals söfnuðust 35.731 undirskriftir á Íslandi fyrir öll málin átta sem voru í forgrunni herferðarinnar. Þetta árið var einnig aukin áhersla á að skrifa stuðningskveðjur til að sýna þolendum mannréttindabrota og aðstandendum þeirra stuðning, sem er ekki síður mikilvægt til að veita þeim von og styrk. Samtals voru 335 stuðningskveðjur skrifaðar hér á landi, bæði handskrifaðar og á netinu, sem er 44% aukning á milli ára.
Í heildina var gripið til tæplega 4 milljóna aðgerða í 200 löndum og landsvæðum, rúmlega 400 þúsund einstaklingar voru virkjaðir til aðgerða í gegnum mannréttindafræðslu og tæplega 330 þúsund stuðningskveðjur voru skrifaðar til þolenda brotanna og aðstandenda þeirra.
Viðburðir
Herferðin hófst af fullum þunga um miðjan nóvember með svokölluðum Háskóladegi í Háskóla Íslands, þar sem haldnir voru tveir viðburðir í samstarfi við félög nemenda í mannfræði og félagsfræði. Annar viðburðurinn fór fram á Háskólatorgi þar sem mannfræðinemendur, ásamt starfsfólki og ungliðum Íslandsdeildar Amnesty International, söfnuðu undirskriftum og buðu um leið upp á gular bollakökur. Tvö mál ársins 2025 tengdust börnum, annað frá Ekvador og hitt frá Suður-Afríku, og voru þau sérstaklega kynnt. Hinn viðburðurinn fór fram um kvöldið í Stúdentakjallaranum þar sem boðið var upp á spurningakeppni í tengslum við mál ársins. Samtals söfnuðust rúmlega 1000 undirskriftir á Háskóladeginum.
Í lok nóvember, annað árið í röð, söfnuðu nemendur úr IB-námi í MH 1032 undirskriftum fyrir herferðina í Kringlunni. Hluti af námi þeirra felst í því að láta af sér gott leiða. Einnig var endurvakinn viðburður á skrifstofu deildarinnar, sem legið hafði í láðinni síðustu ár, en þar bauðst gestum að skrifa stuðningskveðjur til þolenda mannréttindabrotanna og aðstandenda þeirra í notalegri stemmingu á aðventunni.
Þá stóðu aðgerðasinnar á Akureyri, Egilsstöðum og Kópaskeri fyrir undirskriftasöfnun en þessir aðilar hafa í árafjöld staðið vaktina og safnað ótrúlegum fjölda undirskrifta á kaffihúsum, bókasöfnum og jólamörkuðum en margir íbúar á þessum stöðum mæta árlega á viðburðina og líta á þá sem hluta af undirbúningi jólanna. Fjöldi bókasafna víðs vegar um landið hélt einnig áfram þátttöku sinni og var framlag bókasafna á landsbyggðinni sérstaklega kærkomið.
Íslandsdeild Amnesty International kann öllum þessum fjölda einstaklinga sem lögðu herferðinni liðsinni sitt sérstakar þakkir fyrir óeigingjarnt starf.
Þátttaka skóla
Líkt og síðastliðin ár var haldin framhaldsskólakeppni í undirskriftasöfnun í tengslum við herferðina og söfnuðust samtals 4584 undirskriftir fyrir málin átta. Menntaskólinn við Hamrahlíð bar sigur úr býtum og safnaði flestum undirskriftum en Framhaldsskólinn á Laugum sigraði miðað við nemendafjölda. Við óskum báðum þessum skólum innilega til hamingju með árangurinn.
Í heildina voru haldnar 35 kynningar í skólum landsins, bæði grunnskólum og framhaldsskólum, en ný nálgun var þar í forgrunni þar sem lögð var áhersla á að virkja samkennd nemenda með sérstökum samkenndarspjöldum sem mæltist mjög vel fyrir. Samkenndarspjöldin byggjast á sálfræðikenningum um samkennd og persónulegum sögum en þar eru ungir þolendur mannréttindabrota úr herferðinni síðustu ár kynntir. Tilfinningin fyrir mannréttindabrotum verður dýpri ef nemandinn býr fyrst til persónuleg tengsl við þolandann og tengir við eigin reynsluheim.
Alls tóku 6 grunnskólar þátt í herferðinni árið 2025 og voru undirskriftirnar að mestu handskrifaðar í fræðslum á vegum Íslandsdeildarinnar. Grunnskólarnir sem tóku þátt voru: Aþjóðaskólinn, Barnaskóli Hjallastefnunnar í Reykjavík, Garðaskóli, Skarðshlíðarskóli, Háteigsskóli og Hvolsskóli.
Teiknimyndasaga var einnig þýdd á íslensku sem tengdist einu máli herferðarinnar árið 2025 og fengu nokkrir skólar hana að gjöf. Sagan fjallar um baráttustúlkur í Amazon-skóginum í Ekvador sem berjast gegn eyðileggingu af völdum gasbruna sem tengist olíuframleiðslu.
Við þökkum öllum þátttakendum skólanna innilega fyrir stuðninginn.
Afhending undirskrifta
Eitt af málum herferðarinnar var mál Ellinor Guttorm frá Noregi. Hún er samísk frumbyggjakona frá Noregi sem berst fyrir því að vernda ævaforna lífshætti samfélags hirðingja í norðurhluta Noregs. Ráðgert er að reisa hundruð vindmylla sem ógnar beitarlandi og menningu samfélags hennar.
Árni Kristjánsson, ungliða-og aðgerðastjóri Íslandsdeildarinnar, og ungliðarnir Magnús Ingi Árnason og Magnús Sigurður Jónasson héldu í norska sendiráðið þann 10. apríl til að afhenda undirskriftir sem söfnuðust fyrir málið. Staðgengill norska sendiherrans, Marianne Kvan, tók á móti 3571 undirskrift til stuðnings Ellinor Guttorm og Sömum í Noregi þar sem þess var krafist að norsk stjórnvöld virtu rétt Sama til þátttöku í ákvarðanaferli sem hefur áhrif á landsvæði þeirra og lífsviðurværi.
Undirskriftirnar fyrir hin málin sjö voru sendar með pósti til yfirvalda í viðkomandi löndum.
Góðar fréttir
Á hverju ári berast okkur jákvæðar fregnir af málum þeirra einstaklinga sem barist er fyrir í Þitt nafn bjargar lífi.
Sonia Dahmani frá Túnis er lögfræðingur sem hefur helgað líf sitt baráttunni fyrir mannréttindum. Öryggissveitir handtóku hana í maí 2024 fyrir að tjá sig um málefni á borð við kynþáttafordóma. Sonia var sakfelld og dæmd til fangavistar á grundvelli tilhæfulausrar ákæru um að „dreifa fölskum fréttum“. Hún var leyst úr haldi þann 27. nóvember árið 2025, stuttu eftir að herferðin hófst af fullum þunga um heim allan. Haldið var áfram að safna undirskriftum því að ákærur á hendur henni voru ekki felldar niður.
Íslandsdeild Amnesty International fagnar lausn hennar og sýnir að baráttan skilar árangri.
Við þökkum öllum þeim sem tóku þátt kærlega fyrir stuðninginn í herferðinni á síðasta ári og vonum að við fáum enn betri viðtökur síðar í ár þegar herferðin hefst að nýju.