Góðar fréttir
11. nóvember 2022Þitt nafn bjargar lífi: Samtakamáttur til sigurs 2022
Þegar allt virðist á niðurleið í heiminum getur verið niðurdrepandi að lesa fréttirnar. Þá er erfitt ímynda sér að hægt sé breyta heiminum til hins betra. Þitt nafn bjargar lífi, hin árlega alþjóðlega herferð Amnesty International, sýnir að þú getur haft mikil áhrif með lítilli fyrirhöfn. Það eina sem þarf að gera er að skrifa nafn sitt undir tíu mál til stuðnings þolendum mannréttindabrota og krefja þannig stjórnvöld um umbætur. Það er meira að segja hægt að skrifa undir öll málin í einu!
Það er kannski erfitt að trúa því að svona einföld aðgerð skili árangri en það gerir hún svo sannarlega. Milljónir einstaklinga eins og þú hafa breytt lífi fjölda þolenda mannréttindabrota frá upphafi herferðarinnar árið 2001. Undirskriftir fólks um heim allan hafa skipt sköpum í lífi allra þessara einstaklinga sem barist hefur verið fyrir í herferðinni. Á liðnu ári höfum við séð jákvæðar breytingar í nokkrum málum einstaklinga sem voru nýlega hluti af herferðinni.
Okkur langar því að deila nokkrum sögum um árangur þar sem þitt nafn hafði áhrif.
Umhverfisverndarsinni laus úr haldi
Bernardo Caal Xol, kennari og umhverfisverndarsinni, var fangelsaður í janúar 2018 vegna baráttu sinnar fyrir réttindum Maya-frumbyggjasamfélagsins Q’eqchi’ sem hann tilheyrir. Samfélagið stóð frammi fyrir því að missa lífsviðurværi sitt vegna vatnsaflsvirkjana á Cahabón-ánni í norðurhluta Gvatemala. Í nóvember 2018 var hann dæmdur í sjö ára og fjögurra mánaða fangelsi á grundvelli falskra ákæra. Um hálf milljón einstaklinga um heim allan kallaði eftir lausn hans í herferðinni Þitt nafn bjargar lífi 2021. Á Íslandi sýndu 6.597 einstaklingar stuðning sinn í verki fyrir máli hans með því að skrifa undir nafn sitt. Í mars 2022 var Bernardo loks leystur úr haldi.
Þakkarmyndband sem Bernardo Caal Xol sendi stuðningsfólki Amnesty International hefst á þessum orðum:
„Ég, Bernardo Caal Xol, frá Maya-samfélaginu Q’eqchi’ í Gvatemala er mjög þakklátur fyrir hvert og eitt ykkar. Þið hafið gefið mér von um réttlæti, frelsi og jafnrétti sem verður að ná yfirhöndinni í öllum samfélögum og löndum heims.“
Bernardo Caal Xol með fjölskyldu sinni eftir að hann var leystur úr haldi
Þriggja barna faðir sameinast fjölskyldu sinni á ný
Germain Rukuki, mannréttindafrömuður frá Búrúndí, var leystur úr haldi þann 30. júní 2022 eftir að hafa afplánað fjögur ár af 32 ára fangelsisdómi. Hann var fundinn sekur á grundvelli fjölda upploginna sakargifta sem tengdust mannréttindastörfum hans. Hann var fangelsaður áður en hann fékk tækifæri til að kynnast yngsta syni sínum sem fæddist nokkrum vikum eftir að hann var handtekinn í júlí 2017. Fjölskylda hans neyddist til að flýja Búrúndí af ótta við hefndaraðgerðir.
Í fyrstu gat Germain ekki yfirgefið landið eftir að hann var laus úr haldi en í febrúar 2022 sameinaðist hann loks fjölskyldu sinni á ný í Belgíu. Rúmlega 436.000 einstaklingar um allan heim kröfðust lausnar Germain.
„Þitt nafn bjargar lífi hefur virkilega jákvæð áhrif. Stuðningurinn hefur fengið mig, Germain Rukuki, til þess að vera enn ákveðnari í að verja mannréttindi eftir fangelsisvistina.“
Germain Rukuki sameinast fjölskyldu sinni á ný í febrúar 2022. Hann hitti þá loksins yngsta son sinn í fyrsta sinn.
Frelsaður af dauðadeild
Magai Matiop Ngong var 15 ára skólastrákur í Suður-Súdan þegar hann var skyndilega dæmdur til dauða fyrir morð í nóvember 2017. Magai sagði frá því að hann hefði látið dómarann vita að þetta hefði verið slys og að hann væri aðeins barn að aldri. Þrátt fyrir það þurfti Magai að fara fyrir rétt vegna morðs án þess að hafa aðgang að lögfræðingi. Rúmlega 700.000 einstaklingar gripu til aðgerða til stuðnings máli Magai í herferðinni Þitt nafn bjargar lífi árið 2019. Innan árs var dauðadómur yfir honum felldur úr gildi og í mars 2022 var niðurstaða hæstaréttar að leysa hann úr haldi vegna aldurs hans við sakfellingu. Magai er nú kominn í öruggt skjól erlendis og er enn staðráðnari að hjálpa fólki í sömu stöðu. Hann þakkaði öllu stuðningsfólki hans með þessum orðum:
„Þetta eru einstaklingar sem bjarga lífi. Þetta fólk gerði mér kleift að vera hér í dag. Ég er nokkuð viss um að það hefur ekki aðeins bjargað mínu lífi heldur bjargað lífi fólks um allan heim.
Magai fagnar frelsinu hjá Amnesty International í Kenýa í apríl 2022.
Herferðin Þitt nafn bjargar lífi
Nú er Þitt nafn bjargar lífi 2022 að hefjast. Leiðarstef í öllum málunum í ár er baráttan fyrir réttinum til að mótmæla. Sagan sýnir að mótmæli eru mikilvægt afl í átt að umbótum. Sífellt færist í aukanna að stjórnvöld víða um heim reyni að takmarka rétt fólks til að mótmæla.
Þitt nafn bjargar lífi í ár tekur fyrir tíu mál þar sem 13 einstaklingar hafa sætt mannréttindabrotum fyrir það eitt að tjá skoðun sína.
Ef þú efast enn um að nafn þitt hafi áhrif þá getur Jani Silva, umhverfisverndarsinni í Kólumbíu staðfest það. Jani barðist óhrædd gegn mengun og mannréttindabrotum en fékk að finna fyrir því. Það var fylgst með henni, henni ógnað og hún fékk líflátshótanir. Í kjölfar herferðarinnar árið 2020 sagði Jani:
„Ég er þakklát fyrir öll bréfin. Frá mínum dýpstu hjartarótum, þökk sé herferðinni þá er ég á lífi og var ekki drepin vegna þess að þeir vissu af ykkur.“
Lestu einnig
ÞITT NAFN BJARGAR LÍFI
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu