Fréttir
10. október 2021Alþjóðadagur gegn dauðarefsingunni: Gróf mismunun gegn konum á dauðadeild
Konum á dauðadeild hefur í mörgum tilfellum verið neitað um réttlæti fyrir líkamlegt og kynferðislegt ofbeldi sem þær hafa þurft að þola og var undanfari og ástæða glæpsins sem þær voru sakfelldar fyrir. Amnesty International vekur athygli á þessu á alþjóðadegi gegn dauðarefsingunni þann 10. október.
Noura Hussein Hamad Daoud, frá Súdan, var dæmd til dauða í apríl 2017 fyrir morð á manni sem hún var neydd til að giftast 16 ára gömul. Þegar hún flutti inn á heimili hans þremur árum síðar var henni nauðgað og hún beitt ofbeldi af hálfu eiginmanns síns. Við ódæðið naut hann hjálpar tveggja bræðra sinna og frænda. Amnesty International í samstarfi með öðrum samtökum þrýsti á mál hennar sem leiddi til þess að dauðadómur yfir henni var mildaður. Aðrar konur hafa ekki verið jafn heppnar.
„Margar konur hafa verið sakfelldar og dæmdar til dauða í kjölfar óréttlátra og óvandaðra réttarhalda þar sem oft var litið fram hjá málsbótum eins og langvarandi ofbeldi og kynferðisofbeldi.“
Rajat Khosla, yfirmaður rannsókna og stefnumála hjá Amnesty International.
Grimm refsing
Í mörgum tilfellum hafa stjórnvöld brugðist skyldu sinni í viðbrögðum sínum við kvörtunum og þeirri skyldu að koma í veg fyrir mismunun. Það ýtir undir menningu þar sem ofbeldi gegn konum fær að líðast. Konur sem verða fyrir ofbeldi halda áfram að vera jaðarsettar í dómskerfinu.
Árið 2018 var Zeinab Sekaanvand tekin af lífi í Íran. Hún var einungis barn að aldri þegar hún gekk í hjónaband. Árum saman þurfti hún að þola kynferðisofbeldi af hálfu eiginmanns síns og mágs. Hún var handtekin 17 ára gömul fyrir morðið á eiginmanni sínum og síðar sakfelld í kjölfar gífurlega ósanngjarnra réttarhalda.
„Að dæma þessar konur til dauða er ekki aðeins grimm og viðurstyggileg refsing sem er viðhaldið í dómskerfinu víða um heim heldur þurfa þær að þjást fyrir að stjórnvöld hafa brugðist skyldu sinni til að takast á við mismunun. Að auki er skortur á gagnsæi þegar kemur að beitingu dauðarefsingarinnar sem þýðir að við vitum að þessi mál eru aðeins toppurinn á ísjakanum.“
Rajat Khosla, yfirmaður rannsókna og stefnumála hjá Amnesty International.
Afnemum dauðarefsinguna
Í sumum löndum, þar á meðal Gana, er dauðarefsing lögboðin fyrir ákveðna glæpi eins og morð. Það leiðir til þess að konur geta ekki greint frá kynbundnu ofbeldi og mismunun sér til refsilækkunar við sakfellingu. Í Malasíu er meirihluti kvenna á dauðadeild fyrir vímuefnasmygl, sérstaklega konur með erlent ríkisfang, þar sem dauðarefsing er lögboðin fyrir slík brot.
Á alþjóðadegi gegn dauðarefsingunni kallar Amnesty International eftir því að stjórnvöld í Gana styðji við frumvarp um að afnema dauðarefsingu í landinu fyrir flesta glæpi sem fyrsta skref í að afnema dauðarefsinguna með öllu. Hægt er að styðja málstaðinn með myllumerkinu #Ghanavoteforabolition á samfélagsmiðlum.
„Í lok ársins 2020 höfðu 108 lönd afnumið dauðarefsinguna með öllu. Sem betur fer er heimurinn að færa sig frá þeirri hugmynd að ríki hafi vald til að neita fólki um réttinn til lífs. Þar til öll lönd hafa afnumið dauðarefsinguna höldum við áfram baráttunni. Saman getum við átt þátt í að þessi grimma refsing heyri sögunni til.“
Rajat Khosla, yfirmaður rannsókna og stefnumála hjá Amnesty International.
Lestu einnig
ÞITT NAFN BJARGAR LÍFI
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu