Fréttir
26. júlí 2019Dagana 13. – 17. júlí sóttu þær Þórkatla Haraldsdóttir og Arndís Ósk Magnúsdóttir ráðstefnuna European Youth Meeting (EYM) fyrir hönd Íslandsdeildar Amnesty International.
Ráðstefnan var haldin í hjarta Evrópu: Brussel og eru þær báðar reynslumiklir aðgerðasinnar úr ungliðahreyfingu Íslandsdeildarinnar. Á ráðstefnunni voru samankomin meira en 40 ungmenni, sem fulltrúar sinna deilda, með hugsjón um betri heim þar sem allir geta notið mannréttinda. Ráðstefnan, sem haldin er árlega, er bæði skipulögð og leidd af ungu fólki og var dagskráin þétt skipuð.
Hér að neðan segja þær Arndís og Þórkatla stuttlega frá því sem fór fram.
Strax á fyrsta degi héldum við út á götur Brussel og framkvæmdum sjónræna aðgerð sem var tengd þema ráðstefnunnar í ár, „Minnkandi rými í Evrópu” (e. shrinking space for civic society). Þá héldum við skiltum á lofti, þar sem grípandi lýsingar á mannréttindabrotum um alla Evrópu fönguðu athygli gangandi vegfarenda. Mismunandi málefni voru tekin fyrir frá hverju landi fyrir sig og úr varð ein heild aðgerðasinna sem stóð saman gegn mannréttindabrotum.
Seinni aðgerðin sem fór fram á ráðstefnunni var beint að ástandi hernámsins í Súdan. Allir ungliðarnir klæddust bláu, sem hefur orðið að einkennislit baráttunnar fyrir frelsi og valdi til fólksins í Súdan, og stóðu saman í hóp á meðan þau voru tekin upp á myndband þar sem allir kölluðu saman táknræn arabísk orð áður en teknar voru myndir fyrir samfélagsmiðla.
Á síðasta deginum fengum við að njóta okkar í sérhæfðum aðgerðahópum að eigin vali, ýmist um þungunarrof, réttindi hinsegin fólks, tjáningarfrelsi í Evrópu eða loftslagsmál. Afurðirnar voru stafrænar, bæði í mynd- og myndbandsformi og hugmyndir kviknuðu sem áætlað er að nota enn frekar í framtíðaraðgerðum. Sáu ungliðarnir alveg um skipulagningu, undirbúning og framkvæmd þessara aðgerða innan síns hóps og kynntu að lokum fyrir öðrum. Það sem einkenndi þessa æfingu mest var að hver hópur fékk einungis klukkutíma til framkvæmda, undirbúnings og skipulagningu og þurftu allir einstaklingar að vinna vel saman.
Á meðan ráðstefnunni stóð fengum við bæði mikla fræðslu og ítarlega og fræðandi fyrirlestra. Þar má nefna fyrirlesara frá Póllandi sem fjallaði um átök innan stjórnkerfisins hvað varðar vald dómstóla og hvar það liggur. Við unnum í vinnusmiðjum þar sem við hlutum dýpri þekkingu á fjölþættingu (e. intersectionality), stjórnarháttum, sjálfsrækt og næstu alþjóðlegu stefnu samtakanna. Til okkar komu einnig tveir ungir umhverfissinnar sem þjálfuðu okkur í að takast á við áskoranir í tengslum við umhverfismál. Eins fengum við svæðistengda leiðsögn með samtökunum Refugee Work Flanders, þar sem við gengum um Brussel og skyggndumst inn í móttökuferli flóttafólks og umsækjenda um alþjóðlega vernd í Belgíu.
Síðast en ekki síst var það tækifærið til þess að læra af hvert öðru sem var stór liður í dagskrá ráðstefnunnar. Þátttakendur höfðu möguleika á því að kynna afrek sín fyrir hvert öðru og taka þátt í vinnusmiðjum þar sem áhersla var lögð á að deila áfram færni sinni, kunnáttu og reynslu.
Það er ánægjulegt að finna fyrir því hvernig Amnesty International valdeflir ungu kynslóðina. Ráðstefnur líkt og European Youth Meeting gefa manni ómetanlegt tækifæri til að vaxa sem aðgerðasinnar, mynda sterk sambönd og öflugt tengslanet innan hreyfingarinnar. Eftir viku fulla af hvatningu, snerum við til baka reynslunni ríkari, með nýja vini til frambúðar og reiðubúnar til þess að dreifa þekkingunni sem EYM gaf okkur áleiðis.
Arndís og Þórkatla
Lestu einnig
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu