Atena Daemi hefur verið ötul í barátt­unni gegn dauðarefs­ing­unni í Íran. Hún skrifaði stöðu­færslur á Face­book og Twitter þar sem hún gagn­rýndi aftökur í landinu. Hún dreifði bæklingum og tók þátt í frið­sam­legum mótmælum gegn aftöku á ungri konu. Því miður krefjast aðgerðir sem þessar mikils hugrekkis í Íran.

Hún var dæmd í sjö ára fang­elsi og aðgerðir hennar voru notaðar gegn henni sem sönn­un­ar­gögn fyrir glæp­sam­legu athæfi. Rétt­ar­höld í máli hennar voru farsi þar sem þau tóku aðeins fimmtán mínútur og var hún sakfelld fyrir upplognar sakir. Þeirra á meðal var það „að leggja á ráðin um að fremja glæp gegn þjóðarör­yggi“.

Meðferðin á henni er sárt dæmi um svæsna herferð gegn fólki sem kallar eftir rétt­læti í Íran. Tugir einstak­linga hafa verið fang­els­aðir og enn fleiri eru undir eftir­liti, yfir­heyrðir og lögsóttir til að þagga niður í þeim.

Atena hefur nú þegar orðið fyrir miklum þján­ingum. Hún hefur verið barin, úðað hefur verið á hana piparúða og hún sett í einangr­un­ar­klefa en hún heldur ótrauð áfram að berjast fyrir mann­rétt­indum. Fyrr á þessu ári fór hún í hung­ur­verk­fall til að mótmæla flutn­ingi yfir í alræmt fang­elsi. Heilsu hennar fer óðum hrak­andi. Það þarf að leysa hana úr haldi í dag.