Unglingsstúlku hótað lífláti
Janna Jihad er 15 ára gömul og býr á Vesturbakkanum, sem er hernuminn af Ísrael. Lífið þar er langt frá því að vera venjulegt vegna kerfisbundinnar mismununar. Janna vill aðeins eiga venjulega barnæsku.
„Eins og hvert annað barn vil ég geta spilað fótbolta með vinum mínum án þess að táragasbrúsum rigni yfir okkur,“ segir hún.
Janna var sjö ára þegar ísraelski herinn myrti frænda hennar. Í kjölfarið ákvað hún að nota síma móður sinnar til að taka upp og sýna heiminum grimmilega mismunun sem samfélag hennar þarf að þola af hálfu ísraelska hersins.
Janna var meðal þeirra allra yngstu til að fá fréttamannapassa, aðeins 13 ára gömul. Hún hefur fjallað um þá kúgun sem Palestínubúar hafa mátt þola af hálfu ísraelska hersins, kúgun sem hefur oft verið banvæn. Hún hefur meðal annars fjallað um skyndiárásir að næturlagi, niðurrif heimila og skóla ásamt eyðileggingu samfélaga sem barist hafa fyrir réttindum sínum.
Palestínsk börn þjást sérstaklega. Mörg þeirra hafa verið myrt eða særð af hálfu ísraelska hersins. Ísrael hefur skrifað undir Barnasáttmálann en þrátt fyrir það hafa ísraelsk stjórnvöld ekki verndað palestínsk börn á Vesturbakkanum. Ísraelsk börn njóta aftur á móti verndar, jafnvel þau sem búa á ólöglegum landtökusvæðum nálægt heimaslóðum Jönnu.
Janna hefur verið áreitt og fengið líflátshótanir fyrir það að stunda heiðarlega fréttamennsku. Hún gefst þó ekki upp.
„Ég vil vita hvernig það er að búa við frelsi í heimalandi mínu og hvernig það er að búa við réttlæti, frið og jafnrétti án kerfisbundinnar mismununar,“ segir hún. Styðjum hana í þeirri baráttu.
Krefstu þess að ísraelsk stjórnvöld veiti Jönnu vernd fyrir mismunun og ofbeldi.
Þín undirskrift getur bjargað mannslífi
Suður-Afríka
Unecebo Mboteni, þriggja ára drengur, féll ofan í kamar á leikskóla sínum þann 18. apríl 2024 í austurhluta Cape-héraðs. Degi síðar lét hann lífið. Ári síðar hefur fjölskylda hans ekki fengið svör við því hvers vegna þessi harmleikur átti sér stað. Enginn hefur verið dreginn til ábyrgðar.
Mjanmar
Fjölmiðlun er hættuleg starfsgrein í Mjanmar. Í kjölfar þess að fellibylurinn Mocha reið yfir landið í maí 2023 ferðaðist blaðaljósmyndarinn Sai Zaw Thaike til Rakine-héraðs til að greina frá eftirköstum fellibylsins en var handtekinn. Sai Zaw var síðan dæmdur í 20 ára fangelsi af herrétti í september 2023. Hann hefur mátt þola einangrunarvist og barsmíðar af hálfu starfsfólks fangelsisins.
Noregur
Ellinor Guttorm Utsi er samísk frumbyggjakona sem berst fyrir því að vernda ævaforna lífshætti samfélags hreindýrahirðingja í norðurhluta Noregs. Ráðgert er að reisa hundruð vindmylla á landsvæði Sama, sem ógnar beitilandi þeirra og menningu. Norsk stjórnvöld verða að virða rétt Sama til þátttöku í ákvarðanaferli sem hefur áhrif á landsvæði þeirra og lífsviðurværi.
Madagaskar
Damisoa flúði ásamt fjölskyldu sinni hungursneyð í Androy-héraði í suðurhluta Madagaskar árið 2021 vegna þurrka á svæðinu. Í stað þess að eignast betra líf í Boeny í norðvesturhluta landsins eins og vonir stóðu til var þeim úthlutað bágbornum húsakosti á svæði sem stjórnvöld settu á laggirnar fyrir endurbúsetu fólks vegna þurrka. Þar er vatn af skornum skammti og hreinlætisaðstaða slæm.
Ekvador
Baráttustúlkur Amazon-skógarins berjast, ásamt samtökunum UDAPT og samvinnuhópi sem kallar sig Eliminen los Mecheros, Enciendan la Vida (Stöðvið gasbruna, tendrið líf), gegn eyðileggingu af völdum gasbruna. Þessi hópur ungra kvenna frá Ekvador sætir ofbeldisfullum hótunum vegna baráttu sinnar gegn loftslagsvánni. Árið 2021 úrskurðaði dómstóll í Ekvador að gasbruni bryti gegn mannréttindum og réttinum til heilnæms umhverfis og var stjórnvöldum fyrirskipað að stöðva notkun hans. Þrátt fyrir það logar hann víða enn.
Kambódía
Baráttuhópurinn Móðir náttúra Kambódía (e. Mother Nature Cambodia) hefur barist ötullega fyrir umhverfisvernd frá árinu 2013. Allt frá árinu 2016 hafa yfirvöld ítrekað gert atlögu að hópnum með handtökum og saksóknum. Sex aðgerðasinnar hópsins voru dæmdir í sex til átta ára fangelsi í júní 2024. Einn þeirra flúði Kambódíu til að geta haldið starfi þeirra áfram en hinir fimm þurfa að þola erfiðar aðstæður í fangelsi.
Hondúras
Allt frá árinu 2015 lögðu Juan López og aðrir aðgerðasinnar frá Tocoa-héraði í norðurhluta Hondúras sig fram um að verja umhverfi sitt gegn námuvinnslu og orkuframleiðslu sem ógnuðu ám, skógum og þjóðgarði. Juan var skotinn til bana 14. september 2024 í bíl sínum á leið frá kirkju af grímuklæddum byssumanni. Meintur byssumaður og tveir grunaðir vitorðsmenn hafa verið ákærðir fyrir morð. Réttarhöldin hafa enn ekki farið fram.
Túnis
Sonia Dahmani er lögfræðingur sem hefur helgað líf sitt baráttunni fyrir mannréttindum. Öryggissveitir í Túnis handtóku hana í maí 2024 fyrir að tjá sig um málefni á borð við kynþáttafordóma. Sonia var sakfelld og dæmd til fangavistar á grundvelli tilhæfulausrar ákæru um að „dreifa fölskum fréttum“. Hún á yfir höfði sér allt að 20 ára fangavist og henni er haldið fanginni við ómannúðlegar aðstæður.
Allt starf Amnesty International er fjármagnað og drifið áfram af einstaklingum eins og þér. Hvert framlag — hver aðgerð vegur þungt.
Styrktu & skrifaðu undir áköll með símanum
Einfalt og áhrifaríkt aðgerðanet
Vertu með í netákallinu, þar sem meðlimir fá tilkynningar í tölvupósti um alvarleg mannréttindarbrot sem krefjast tafarlausra viðbragða.
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Með því að skrifa undir málin samþykkir þú skilmála Íslandsdeildar Amnesty International um undirskriftir og persónuverndarstefnu
