Kyung Seok Park lamaðist fyrir neðan mitti eftir svif­dreka­flug­slys í ágúst 1983. Fyrir slysið velti hann því aldrei fyrir sér hvernig líf fatlaðs fólks væri. Hann var 22 ára, á kafi í háskóla­námi og naut þess að spila á gítar og skemmta sér með vinum sínum. Þegar Kyung Seok þurfti að takast á við daglegt líf sem fatl­aður einstak­lingur í Suður-Kóreu var það óbæri­lega erfitt, jafnvel hættu­legt. Hann gerðist í kjöl­farið aðgerðasinni.

Kyung Seok er í forsvari fyrir hreyf­inguna Samstöðu gegn mismunun vegna fötl­unar (Soli­da­rity against Disa­bility Discrim­ination SADD) sem vinnur í þágu fatlaðs fólks. Í aðgerð­a­starfi sínu hefur hann einbeitt sér að almenn­ings­sam­göngum. Hindr­anir eru á aðgengi að almenn­ings­sam­göngum og hefur fatlað fólk ekki tæki­færi til að taka þátt í samfé­laginu að fullu eins og að ferðast í og úr vinnu eða skóla og lifa sjálf­stæðu lífi. Fjöldi hjóla­stóla­not­enda í Seúl hefur særst eða jafnvel látið lífið við að nota óöruggar hjóla­stóla­lyftur á lestar- og neðanjarð­ar­lest­ar­stöðvum.

Árið 2021 hófu Kyung Seok og aðrir aðgerða­sinnar úr hreyf­ing­unni SADD að mótmæla frið­sam­lega til að krefjast aukins fjár­magns til málefna fatlaðs fólks. Hjóla­stóla­not­endur fóru samtímis í og úr neðanjarð­ar­lest á háanna­tíma. Yfir­völd í Seúl brugðust illa við, þar á meðal með ofbeldi. Mótmælin hafa verið bæld niður og lögregla hefur dregið aðgerða­sinna út af lest­ar­stöðv­unum með valdi. Stjórn­mála­fólk hefur farið í ófræg­ing­ar­her­ferð og málað fatlaða aðgerða­sinna upp sem trufl­andi fyrir almenning. Borg­ar­stjórn Seúl, höfuð­borgar Suður-Kóreu, hefur hafið mála­ferli gegn frið­sömum mótmæl­endum til að reyna að bæla mótmæli þeirra enn frekar niður.

Kyung Seok heldur áfram baráttu sinni þrátt fyrir að hafa næstum verið kyrktur af lögreglu og lest­ar­starfs­fólki á frið­sam­legum mótmælum. Hann sætir fjöl­mörgum málsóknum vegna aðgerð­a­starfs síns: „Við neitum að bíða lengur. Við krefj­umst heims þar sem enginn er jaðar­settur.“