Dönsk stjórnvöld hafa ekki sett samþykki í forgrunn við skilgreiningu á hugtakinu nauðgun í hegningarlögum landsins. Lögin vísa eingöngu til ofbeldis eða hótana. Aðeins 8 lönd af 31 Evrópulandi hafa sett kröfu um samþykki við skilgreiningu á hugtakinu nauðgun og er Ísland eitt þeirra.
Háskólinn í Suður-Danmörku áætlar að brotið hafi verið kynferðislega á allt að 24.000 konum og stúlkum í Danmörku árið 2017. Aðeins 890 nauðganir voru tilkynntar til lögreglu það ár og einungis 535 mál enduðu með ákæru. Fjöldi dóma var 94. Þessar tölur eru óásættanlegar.
Einbeittur baráttuvilji þolenda kynferðisofbeldis til að knýja á um breytingar hefur skapað tækifæri fyrir danskt samfélag að gera breytingar á kerfinu og þörf er á þínum stuðningi.
„Kannski hefði þetta ekki gerst ef lögin væru öðruvísi. Lögin höfðu mikið að segja um það hvers vegna ég áttaði mig ekki á að þetta var nauðgun. Þetta er svo viðkæm staða að vera í, mikil skömm sem fylgir…“ – Liva, 25 ára, var nauðgað á tónlistarhátíð árið 2017 af manni sem hún þekkti.
Almenn hegningarlög segja til um hvernig fólk á að haga sér í samfélaginu. Dönsk stjórnvöld verða að hafa það skýrt í lögum að ef samþykki er ekki til staðar sé um nauðgun að ræða . Spurningin er ekki hvort einstaklingur segi „nei“ heldur hvort hann segi „já“.
Skrifaðu undir ákallið núna og krefstu þess að dómsmálaráðherra Danmerkur breyti skilgreiningunni á nauðgun í almennum hegningarlögum þar sem krafa um samþykki verði sett í forgrunn í samræmi við alþjóðleg mannréttindalög.
Krefstu þess einnig að dönsk stjórnvöld leggi áherslu á þjálfun fagaðila í kynfræðslu til að fræða ungt fólk um samþykki og brjóta þannig niður múrana fyrir þau sem þurfa á réttlæti að halda.
Ísland er á meðal þeirra átta landa sem hafa sett kröfu um samþykki við skilgreiningu á hugtakinu nauðgun. Frumvarp þess efnis um breytingar á almennum hegningarlögum var samþykkt á Alþingi 23. mars 2018.
Myllumerki herferðarinnar er #LetsTalkAboutYes
