Í haldi fyrir að styðja fjölskyldur fanga
Marwa Arafa er 33 ára egypsk baráttukona fyrir mannréttindum, þýðandi og móðir. Hún hefur sætt geðþóttavarðhaldi í rúmlega sex ár, eingöngu fyrir friðsamlegt aðgerðastarf.
Marwa helgaði líf sitt stuðningi við fjölskyldur pólitískra fanga og börn sem voru í haldi. Hún var handtekin að tveggja ára dóttur sinni viðstaddri. Dóttir hennar er nú átta ára og langvarandi aðskilnaður frá móður hennar hefur reynst henni afar þungbær.
Marwa sætir refsingu fyrir að sýna fólki í haldi samstöðu, vekja athygli á brotum gegn börnum og aðstoða fjölskyldur við að standa straum af kostnaði vegna fangelsisheimsókna. Í apríl 2020 réðust egypskar öryggissveitir inn á heimili vinar Mörwu, þar sem hún dvaldi. Hún var handtekin og sætti þvinguðu mannshvarfi í tvær vikur þar sem ekkert var vitað hvar hún væri niðurkomin. Síðar var hún ákærð að tilhæfulausu fyrir brot tengd hryðjuverkum. Hún sætir nú ósanngjörnum réttarhöldum á grundvelli ákæra sem geta varðað lífstíðarfangelsi.
Heilsu Mörwu hefur hrakað verulega í fangelsinu þar sem henni er neitað um tilhlýðilega læknisaðstoð. Mál hennar er enn eitt dæmið um misbeitingu hryðjuverkalöggjafar í Egyptalandi gegn stjórnarandstæðingum, mannréttindafrömuðum og öllum þeim sem taldir eru gagnrýna valdhafa. Marwa heldur í vonina og sækir styrk í ástina á dóttur sinni og trúna á réttlætið.
