Ekki vitað um afdrif gagnrýnanda stjórnvalda
Humphrey Polepole er fyrrverandi stjórnarerindreki og gagnrýnandi stjórnvalda sem numinn var á brott af heimili sínu í Dar es Salaam í Tansaníu þann 6. október 2025 af óeinkennisklæddum þjóðaröryggissveitarmönnum.
Fjölskylda hans kom að útidyrahurðinni brotinni og var umtalsvert magn af blóði á vettvangi. Fjölskylda og vinir Humphreys hafa ekki getað náð sambandi við hann síðan. Móðir hans gengur oft grátandi um gólf heima hjá sér og kallar: „Humphrey, hvar ertu? Hvar ertu?“
Humphrey var að öllum líkindum skotmark vegna þess að hann hefur verið berorður í harðri gagnrýni sinni á stjórnvöld. Hann hefur gagnrýnt Samia Suluhu Hassan forseta og stjórnarflokkinn fyrir að þrengja að borgaralegu rými, brjóta mannréttindi og ráðast gegn fulltrúum stjórnarandstöðunnar.
Humphrey er virkur og vel liðinn þátttakandi í nærsamfélagi sínu. Í frítíma sínum styður hann fólk í viðkvæmri stöðu, heimsækir reglulega munaðarleysingjaheimili og skipuleggur námskeið fyrir ungt fólk um þátttöku í stjórnmálum. Fjölskylda hans saknar hans sárt, ekki síst öldruð móðir hans, sem hann annast, og ástkær hundur hans, Fighter. Hann ætti að fá að njóta þess að vera með fjölskyldu sinni sem saknar hans sárt.
Þvingað mannshvarf hans er glæpur samkvæmt alþjóðalögum. Það á við þegar réttmætur grunur er um að einstaklingur hafi verið handtekinn en yfirvöld neita að gefa upplýsingar. Mál hans er dæmi um valdboðsstefnu yfirvalda í Tansaníu þar sem yfirvöld refsa þeim sem gagnrýna stjórnvöld og þagga niður í þeim.
