TikTok-áhrifavaldur og baráttukona fangelsuð fyrir gagnrýni
Baráttukonan Rokiatou Doumbia rekur sitt eigið fyrirtæki og er áhrifavaldur í Malí. Hún er þekkt fyrir hugrekki sitt og að segja skoðanir sínar umbúðalaust.
Á TikTok skapaði hún vettvang þar sem 175.000 fylgjendur hennar gátu rætt opinskátt um erfiðleika daglegs lífs og hækkandi matarverð. Hún fékk í kjölfarið viðurnefnið „Rose Poivron“ („Paprikurósin“).
Rokiatou hefur um árabil stutt konur og fjölskyldur í nærsamfélagi sínu. Hún stofnaði félag sem aðstoðar konur við að koma eigin rekstri á fót og hefur skipulagt dreifingu matvæla til fólks í neyð. Vinir hennar og fylgjendur lýsa henni sem umhyggjusamri og örlátri konu sem láti velferð samfélagsins sig miklu varða.
Hún var handtekin í mars 2023 eftir að hafa gagnrýnt hækkandi framfærslukostnað og heryfirvöld í beinu streymi á TikTok. Hún var handtekin og ákærð fyrir að „hvetja til uppreisnar“, „raska allsherjarreglu“, „kasta rýrð á ríkið“ og fyrir „glæpsamlegt samsæri“. Tveir ákæruliðanna voru síðar felldir niður. Í ágúst 2026 var Rokiatou engu að síður dæmd í tíu ára fangelsi fyrir „að rýra álit ríkisins“ og „glæpsamlegt samsæri“. Hún þarf að afplána sjö ár en þrjú ár dómsins eru skilorðsbundin.
Varðhald Rokiatou endurspeglar víðtæka aðför að gagnrýnendum í Malí, þar sem yfirvöld beita handtökum og ákærum í auknum mæli til að þagga niður í gagnrýnisröddum.
Mál hennar er dæmi um það hvernig konur sem tjá sig opinberlega geta átt á hættu að verða fyrir áreitni á netinu, kúgun, mismunun og fordæmingu sem miðar að því að hrekja þær úr opinberri umræðu. Það varpar jafnframt ljósi á að stafrænir miðlar í Malí eru í auknum mæli orðnir vettvangur eftirlits og stjórnunar.
