Í fangelsi fyrir að standa vörð um lýðræðið
Owen Chow er lýst af vinum sínum sem ævintýragjörnum og heimspekilega þenkjandi. Hann stundaði nám í hjúkrunarfræði, iðkar tíbeskan búddisma og hefur alltaf langað til að eignast hund.
Owen tók þátt í sinni fyrstu kröfugöngu fyrir lýðræðið aðeins 15 ára gamall. Hann lét til sín taka opinberlega í þeirri von að geta stutt fólk sem stendur höllum fæti og stuðlað að réttlátara samfélagi, en í Hong Kong er orðið hættulegt að láta í sér heyra.
Árið 2020 innleiddu stjórnvöld í Peking afar íþyngjandi þjóðaröryggislög í Hong Kong. Í kjölfarið hefur stjórnarandstaðan verið brotin á bak aftur, þaggað niður í óháðum fjölmiðlum og borgaraleg samtök knúin til að hætta starfsemi.
Þrátt fyrir hættuna bauð Owen sig óhræddur fram í óopinberum „forkosningum“ aðeins 23 ára gamall. Markmið þeirra var að velja frambjóðendur fyrir komandi kosningar. Yfirvöld brugðust við með því að saka Owen og 46 aðra um samsæri til að grafa undan ríkisvaldinu.
Árið 2021 var Owen handtekinn og árið 2024 var hann dæmdur í rúmlega tólf ára fangelsi. Honum verður líklega ekki sleppt úr haldi fyrr en árið 2032 og honum hefur verið haldið í einangrunarvist í að minnsta kosti þrjú ár.
Mál Owens er aðeins eitt af mörgum í Hong Kong. Borgin var eitt sinn þekkt fyrir frjáls og opin skoðanaskipti en nú er íbúum haldið í heljargreipum óttans. Fólk sem áður tók tjáningarfrelsinu sem gefnu telur sig ekki lengur frjálst til að nýta rétt sinn til tjáningar.
