Refsað fyrir að vernda fólkið sitt
Daria Egereva hefur varið ævi sinni í baráttu til verndar réttindum fólks, menningararfleifð og umhverfi.
Hún fæddist í Síberíu og tilheyrir frumbyggjasamfélaginu Selkup, sem telur aðeins 3.500 einstaklinga. Hún menntaði sig til kennara en varð síðan virt baráttukona fyrir réttindum frumbyggja og loftslagsréttlæti.
Vinir hennar lýsa henni sem hlýrri og félagslyndri manneskju með ríka samkennd. Hún hefur yndi af lestri og löngum göngutúrum í náttúrunni. Hún talar oft um uppvaxtarár sín í barrskógabeltinu, víðáttumiklum grænum skógum þar sem hún tíndi ber með fjölskyldu sinni og tengdist náttúrunni sterkum böndum.
Daria á yfir höfði sér 20 ára fangelsi fyrir friðsamlegt mannréttindastarf sitt. Í desember 2025 handtóku rússnesk yfirvöld Dariu. Hún var sökuð um aðild að baráttuhópi frumbyggja sem skilgreindur er sem „hryðjuverkasamtök“ af yfirvöldum. Starf hennar beindist þó að verndun landsvæða, tungumála og menningar frumbyggja. Mál Dariu endurspeglar víðtækt mynstur þar sem aðgerðasinnar eru ásakaðir um „öfgahyggju“ og „hryðjuverkastarfsemi“ af yfirvöldum. Með þessu móti geta valdhafar þaggað niður í óháðum röddum og fælt aðra frá því að tjá sig. Daria gaf gildi sín þó ekki eftir. Þrátt fyrir þrýsting og hótanir hélt hún áfram að sýna hugrekki og einurð til að verja samfélag sitt og réttindi þess.
