Þrátt fyrir sívaxandi sundrungu í heiminum hefur náðst samþykkt mikilvægra laga og ályktana til að bregðast við mannréttindabrotum. Mótmæli og undirskriftasafnanir aðgerðasinna og baráttufólks fyrir mannréttindum hafa átt mikilvægan þátt í þeim árangri. Undanfarna sex mánuði hafa mannréttindafrömuðir víða um heim, sem sætt hafa tilefnislausum saksóknum og fangelsunum, loks fengið réttlæti. Ýmsar herferðir okkar hafa skilað árangri. Hér koma góðar fréttir sem sýna mannréttindasigra sem náðst hafa með samstöðu fyrstu sex mánuði ársins.
Janúar
Alþjóðlegt
Fleiri mannréttindasamtök, félagasamtök og fræðistofnanir geta nú fengið að taka þátt í samningaviðræðum um drög að samningi um glæpi gegn mannúð. Undirbúningsnefndin sem leiðir samningaferlið ákvað að auka þátttöku í samningaviðræðum um þennan fyrsta alþjóðasamning sem snýr eingöngu að glæpum gegn mannúð. Ákvörðun nefndarinnar stuðlar að því að raddir og reynsla þolenda fái að heyrast í þessu sögulega samningsferli. Þetta er í samræmi við tillögur Amnesty International sem komu fram í sameiginlegri yfirlýsingu nokkurra samtaka ásamt yfirlýsingu samtakanna sem lesin var upp á umræðuvettvangi á vegum undirbúningsnefndarinnar.
Grikkland
Mannréttindafrömuðurinn Seán Binder og 23 aðrir einstaklingar, sem tengdust björgunarsamtökum fyrir flóttafólk, voru sýknaðir í Grikklandi í janúar eftir margra ára réttarhöld. Amnesty International hafði barist fyrir réttlæti í máli Seáns frá árinu 2018. Sjö ára baráttu fyrir máli hans er nú lokið.
Seán var í hópi sjálfboðaliða við strendur Lesobs sem fylgdust með hvort bátar flóttafólks væru í neyð og veittu lífsnauðsynlega mannúðaraðstoð.
Líf Seáns var sett á bið vegna ákæra á hendur honum sem hefðu aldrei átt að gefa út. Að veita lífsnauðsynlega mannúðaraðstoð er skylda, ekki glæpur.
Lúxemborg
Léon Gloden innanríkisráðherra Lúxemborgar ákvað að draga til baka frumvarp sem hefði sett mótmælum þrengri skorður með auknu eftirliti, leyfisskyldu og mögulegum viðurlögum gegn bæði skipuleggjendum og mótmælendum. Amnesty International í Lúxemborg barðist gegn frumvarpinu í marga mánuði og lagði fram mýmargar umsagnir í samráðsferli þingsins um frumvarpið með það að markmiði að sýna fram á galla þess.
Tyrkland
Ellefu stjórnarmeðlimir í lögmannafélaginu í Istanbúl voru sýknaðir 9. janúar af ákærum um „að dreifa hryðjuverkaáróðri og dreifa misvísandi upplýsingum til almennings“.
Stjórnarmeðlimirnir ellefu voru sóttir til saka vegna yfirlýsingar sem lögmannafélagið birti 21. desember 2024 um tvö morð á fjölmiðlafólki í norðurhluta Sýrlands og handtökur fjölmiðlafólks og lögfræðinga á friðsamlegum mótmælum í Istanbúl daginn áður.
Amnesty International, ásamt öðrum mannréttindasamtökum og lögfræðisamtökum, gaf út opinberar yfirlýsingar og lagði fram greinargerð sem utanaðkomandi aðili við réttarhöldin til stuðnings stjórnarmeðlimum lögmannafélagsins.
Venesúela
Fjöldi mannréttindafrömuða sem sættu geðþóttavarðhaldi í Venesúela var leystur úr haldi frá janúar til maí 2026. Javier Tarazona, Rocío San Miguel, Kennedy Tejeda, Carlos Julio Rojas, Eduardo Torres, Darío Estrada, Rosa Chirinos, og Yevhenii Trush voru á meðal þeirra en Amnesty International barðist fyrir lausn þeirra. Samtökin munu halda áfram að kalla eftir tafarlausri lausn allra þeirra sem sæta geðþóttavarðhaldi í Venesúela.
Febrúar
Brasilía
Átta árum eftir morðið á baráttukonunni Marielle Franco og Anderson Gomes, bílstjóra hennar, í Ríó de Janeiro auk morðtilrauna á Fernöndu Chaves, fjölmiðlafulltrúa Marielle, hafa þeir sem stóðu á bak við glæpina loks verið fundnir sekir.
Sakfellingin er stór áfangi í baráttunni gegn pólitísku ofbeldi og refsileysi í Brasilíu.
Jafnframt er hún vitnisburður um þrautseigju fjölskyldu Marielle, félagslegra hreyfinga og samtaka á borð við Amnesty International sem hafa árum saman krafist sannleika og réttlætis.
Amnesty International í Brasilíu heldur áfram að kalla eftir víðtækari aðgerðum til að koma í veg fyrir pólitískt ofbeldi og tryggja mannréttindafrömuðum nægilega vernd, sérstaklega svörtum leiðtogum, konum og þeim sem ögra rótgrónum ójöfnuði og mismunun.
Mið-Afríkulýðveldið
Amnesty International greindi frá því 11. febrúar að sérstaki sakamáladómstóllinn (SCC) í Mið-Afríkulýðveldinu ætti á hættu að starfsemin þeirra yrði lögð niður vegna fjárskorts. Það gæti þýtt að þúsundir þolenda og eftirlifenda stríðsglæpa og glæpa gegn mannúð yrðu svipt rétti sínum til réttlætis og skaðabóta.
Sérstaki sakamáladómstóllinn, sem nýtur stuðnings Sameinuðu þjóðanna, er alfarið fjármagnaður með frjálsum fjárlögum frá ríkjum og alþjóðastofnunum. Dómstóllinn varð fyrir verulegum niðurskurði í fjárveitingum árið 2025, einkum vegna þess að Bandaríkin drógu fjárstuðning sinn til baka.
Nokkrum dögum síðar, þann 16. febrúar, brást talsmaður stjórnvalda í Mið-Afríkulýðveldinu við yfirlýsingu Amnesty International og staðfesti að stjórnvöld ynnu að því að afla fjár þannig að sérstaki dómstóllinn gæti haldið áfram störfum sínum. Friðargæslusveit Sameinuðu þjóðanna hefur jafnframt aukið viðleitni sína til að afla fjár til dómstólsins.
Ekvador
Fjölskyldur og þolendur þvingaðra mannshvarfa (leynilegs varðhalds yfirvalda) fengu loks aðgang að sannleika, réttlæti og skaðabótum í kjölfar skýrslu Amnesty International um þvinguð mannshvörf í Ekvador á síðasta ári og öflugs herferðarstarfs samtakanna og samstarfsaðila þeirra. Þrír aðskildir dómsúrskurðir mörkuðu mikilvæg tímamót í þeirri vegferð. Þar ber hæst að hæstiréttur Ekvadors úrskurðaði að fjölskyldur fjögurra svartra barna sem sættu þvinguðum mannshvörfum í Guayaquil ættu rétt á skaðabótum.
Sem hluti af dómsniðurstöðunni var varnarmálaráðuneytinu gert að biðja fjölskyldurnar opinberlega afsökunar. Jafnframt samþykkti þingið að endurskoða lög um þvinguð mannshvörf til að koma í veg fyrir að slík brot endurtaki sig.
Ronnie Medina, faðir eins barnanna sem sættu þvinguðu mannshvarfi, sagði: „Sameinumst um að tryggja að engin önnur fjölskylda í Ekvador þurfi nokkurn tíma að ganga í gegnum þetta.“
Evrópa
Með stuðningi Amnesty International og í samstarfi við teymi víða um Evrópu safnaði evrópska borgaraframtakið My Voice, My Choice rúmlega 1,2 milljónum undirskrifta. Markmiðið var að krefja framkvæmdastjórn Evrópusambandsins um að koma á fót nýrri fjármögnunarleið til að bæta aðgang að þungunarrofi í Evrópu. Framtakið hlaut jafnframt stuðning meirihluta þingmanna Evrópuþingsins í desember 2025.
Í febrúar 2026 staðfesti framkvæmdastjórn Evrópusambandsins í fyrsta sinn að aðildarríki megi nýta fjármagn sem þeim hefur þegar verið úthlutað úr Félagsmálasjóði Evrópu plús til að bæta aðgang að öruggu og löglegu þungunarrofi. Ríkin geta meðal annars notað fjármagnið til að standa straum af ferðakostnaði og heilbrigðisþjónustu fyrir fólk sem þarf að sækja þungunarrof til annars ríkis. Þátttaka er valfrjáls og hvert ríki þarf að koma á fót eigin áætlun og skilgreina hverjir geti fengið stuðning. Ákvörðunin tryggir því ekki sjálfkrafa fjárhagsaðstoð, en hún opnar aðildarríkjum leið til að veita slíkan
Nígería
Adamu Oseni (einnig þekktur sem Hussaini Oseni) var látinn laus 18. febrúar 2026 í kjölfar margra ára baráttu Amnesty International í Nígeríu. Oseni hafði verið dæmdur í lífstíðarfangelsi af héraðsdómstólnum í Ondo-ríki fyrir að hafa haft undir höndum síma sem tengdist vopnuðu ráni, þrátt fyrir að sönnunargögn lægju fyrir um að hann hefði ekki átt neinn þátt í brotinu.
Eftir að Amnesty International í Nígeríu lagði fram náðunarbeiðni fyrir hans hönd árið 2024 var lífstíðardómur hans styttur í 20 ára fangelsi áður en hann var loks leystur úr haldi.
Oseni þakkaði Amnesty International innilega fyrir stuðning og íhlutun samtakanna, sem átti stóran þátt í að tryggja frelsi hans.
Mars
Finnland
Með stuðningi Amnesty International í Finnlandi söfnuðust 50.000 undirskriftir til stuðnings áskorun um að innleiða lagalega kynskráningu fyrir kynsegin fólk í Finnlandi. Þar með hefur náðst sá fjöldi undirskrifta sem þarf til að leggja áskorunina fram fyrir nýkjörið þing árið 2027.
Framtakið „Olemme olemassa“ („Við erum til“) miðar að því að tryggja að einstaklingar geti fengið lagalega kynskráningu í samræmi við eigin kynvitund á grundvelli sjálfsákvörðunarréttar. Tillagan mun veita kynsegin fólki lagalega viðurkenningu og tryggja því jafna vernd.
Lúxemborg
Yfirgnæfandi meirihluti þingmanna samþykkti 3. mars að lögfesta réttinn til þungunarrofs í stjórnarskrá landsins. Amnesty International í Lúxemborg lagði fram stuðningsyfirlýsingu sem ítrekað var vísað til í umræðum á þinginu. Deildin tók jafnframt þátt í fjöldafundum til stuðnings tillögunni.
Lúxemborg er nú annað ríki heims, á eftir Frakklandi, sem hefur sett réttinn til þungunarrofs í stjórnarskrána.
Bandaríkin
Leqaa Kordia var leyst úr varðhaldi bandarísku innflytjenda- og tollgæslustofnunarinnar þann 16. mars eftir að hafa verið eitt ár í haldi. Lausn hennar kom í kjölfar viðvarandi baráttu Amnesty International í Bandaríkjunum og stuðningsfólks samtakanna þar í landi og víða um heim.
Leqaa, sem var í þann mund að tryggja sér dvalarleyfi í Bandaríkjunum, var handtekin eftir að hafa tekið friðsamlega þátt í mótmælum fyrir mannréttindum Palestínubúa. Félagar Amnesty International sendu bandaríska heimavarnarráðuneytinu rúmlega 60.000 bréf þar sem krafist var lausnar hennar.
Eftir að hún fékk frelsi á ný gat hún sameinast fjölskyldu sinni og ástvinum í New Jersey til að fagna saman Eid-hátíðinni (helstu trúarhátíð múslima). Amnesty International mun fylgjast með máli hennar þar til réttlætið hefur náð fram að ganga.
Bandaríska heimavarnarráðuneytið þarf að fella niður mál gegn henni og heimila umsókn hennar um varanlegt dvalarleyfi í Bandaríkjunum. Mál hennar sýnir hversu brýnt er að afnema stefnu um fjöldafangelsanir og brottvísanir bandarískra stjórnvalda. Jafnframt sýnir mál hennar fram á mikilvægi þess að verja tjáningarfrelsið og réttinn til friðsamlegs fundafrelsis í ljósi vaxandi valdboðsstefnu í landinu.
Við lausn hennar sagði Hamzah Abushaban frændi hennar: „Í dag fögnum við frelsinu. Á morgun höldum við áfram baráttunni fyrir réttlæti, ekki aðeins fyrir Leqaa heldur fyrir öll þau sem eru ranglega í haldi.“
Apríl
Brasilía
Í kjölfar margra ára baráttu Amnesty International náðist loks réttlæti í máli Mariu Bernadete Pacífico, einnig þekkt sem Móðir Bernadete. Hún var leiðtogi quilombola-samfélagsins í Brasilíu og mannréttindafrömuður en var myrt fyrir þremur árum. Í apríl sakfelldi kviðdómur í Salvador Marílio dos Santos og Arielson da Conceição dos Santos fyrir morðið og skipulagningu þess.
Sakfellingarnar marka mikilvægt framfaraskref í baráttunni gegn refsileysi árása á mannréttindafrömuði í Brasilíu.
Fílabeinsströndin
Í október 2025 voru hundruð handtekin, þar á meðal barnshafandi konur, í tengslum við mótmæli stjórnarandstöðunnar sem fóru fram nokkrum dögum fyrir forsetakosningarnar.
Amnesty International gaf út yfirlýsingu þar sem samtökin fordæmdu fangelsun mótmælendanna og vöktu athygli á máli þriggja barnshafandi kvenna sem voru handteknar þótt þær hefðu ekki tekið þátt í mótmælunum.
Þrátt fyrir að dómsmálaráðuneytið hafi brugðist hart við yfirlýsingu Amnesty International í fjölmiðlum fyrirskipaði áfrýjunardómstóllinn í Abidjan í apríl að tveimur kvennanna yrði sleppt úr haldi gegn tryggingum með skilyrðum. Þriðju konunni var sleppt úr haldi með skilyrðum þann 20. maí. Amnesty International mun áfram beita sér fyrir því að öllum sem sætt hafa geðþóttavarðhaldi verði sleppt úr haldi og að ákærur á hendur þeim verði felldar niður.
Eþíópía
Million Beyene, fjölmiðlamaður og ritstjóri Addis Standard, var numinn á brott af þremur óeinkennisklæddum mönnum á fréttastofu miðilisins þann 15. apríl. Talið er að hann hafi verið skotmark yfirvalda vegna starfs síns. Amnesty International gaf út skyndiaðgerð 27. apríl til að fólk gæti skrifað yfirvöldum bréf. Degi síðar var honum sleppt úr haldi og hann gat sameinast fjölskyldu sinni á nýjan leik.
Hann hafði þetta að segja eftir að hann fékk frelsi á ný: „Ég er nú í læknismeðferð og geri mitt besta til að ná bata. Þetta var erfið reynsla og ég glími enn við afleiðingarnar en ég held áfram að vera sterkur. Ég er innilega þakklátur fyrir allan þann stuðning sem þið hafið sýnt mér og vinnuna sem þið lögðuð fram. Það skiptir mig miklu máli.“
Finnland
Finnsk stjórnvöld hættu við tilraunaverkefni sem fólst í að greina möguleg bótasvik og misnotkun á opinberum bótum með hjálp gervigreindar. Ákvörðunin var tekin í kjölfar uppbyggilegs samtals Amnesty International í Finnlandi um notkun gervigreindar og alþjóðlegra mannréttindastaðla.
Amnesty International hefur rannsakað sambærilega notkun reiknirita í Danmörku, Hollandi, Svíþjóð og Frakklandi. Rannsóknirnar leiddu í ljós að notkun gervigreindar í þessum ríkjum samræmdist ekki mannréttindastöðlum. Slík notkun til að greina mögulega bótasvik leiðir til óhóflegs eftlits með jaðarsettum hópum sem ýtir undir mismunun og eykur ójöfnuð.
Haíti
Evrópuþingið samþykkti 30. apríl ályktun um vaxandi mansal og misneytingu barna af hálfu vopnaðra glæpagengja á Haíti. Í ályktuninni var tekið mið af helstu tillögum sem Amnesty International lagði fyrir Evrópuþingið í stuttri greinargerð í aðdraganda mikilvægrar umræðu um málið.
Í ályktuninni eru börn sem hafa orðið fyrir misneytingu skilgreind sem þolendur. Markmið hennar er að efla vernd og endurhæfingarúrræði, styðja þolendur og haítísk samtök, stuðla að réttlæti, stöðva brottvísanir til Haítí og sporna gegn ólöglegu flæði vopna og fjármögnunar.
Filippseyjar
Alþjóðlegi sakamáladómstóllinn (ICC) staðfesti allar ákærur um glæpi gegn mannúð á hendur Rodrigo Duterte, fyrrverandi forseta Filippseyja. Þar með er unnt að hefja aðalmeðferð málsins fyrir dómstólnum. Þetta voru söguleg tímamót fyrir þolendur og alþjóðlegt réttlæti. Ákvörðunin sendir jafnframt skýr skilaboð til gerenda sem framið hafa morð af ásetningi með kerfisbundnum og víðtækum hætti, sem telst vera glæpur gegn mannúð, um að þeir munu einn daginn standa frammi fyrir dómstólum og svara til saka.
Ein þeirra kvenna sem misstu eiginmenn sína í hinu svokallaða „stríði gegn fíkniefnum“ undir stjórn Duterte, lýsti fyrir Amnesty International hversu glöð hún varð þegar hún frétti af handtöku hans árið 2025. „Þegar ég heyrði tíðindin stökk ég af gleði. Ég hrópaði í eldhúsinu: Já, já já,“ sagði hún.
Í maí var annað jákvætt skref tekið þegar Alþjóðlegi sakamáladómstóllinn gaf út handtökuskipan á hendur Ronald „Bato“ dela Rosa, fyrrverandi lögreglustjóra á Filippseyjum og einum helsta bandamanni Duterte í „stríðinu gegn fíkniefnum“. Yfirvöld á Filippseyjum segjast ætla að handtaka dela Rosa en hann er enn frjáls ferða sinna eftir að hafa farið í felur.
Sýrland
Sýrlensk yfirvöld hófu réttarhöld yfir Bashar al-Assad og Maher al-Assad að þeim fjarstöddum þann 26. apríl. Jafnframt hófust réttarhöld yfir Atif Najib, fyrrverandi embættismanni öryggissveitanna, sem er í haldi og verður því viðstaddur réttarhöldin. Þeir eru allir ákærðir fyrir glæpi sem voru framdir gegn sýrlensku þjóðinni.
Réttarhöldin marka mikilvægt skref í viðleitni stjórnvalda til að tryggja að gerendur sæti ábyrgð. Fjarvera Bashar al-Assad og helstu sakborninga dregur þó úr mikilvægi þeirra. Amnesty International mun áfram beita sér fyrir því að sakborningarnir verði leiddir fyrir dóm að þeim viðstöddum og svari til saka fyrir gjörðir sínar.
Maí
Argentína
Réttarhöld hófust yfir meintum árásarmönnum sem sakaðir eru um banvæna árás á tvö pör samkynhneigðra kvenna í Barracas-hverfinu í Buenos Aires í maí 2024. Árásin varð Andreu Amarante, Pamelu Cobbas og Roxönu Figueroa að bana. Sofía Castro Riglos lifði árásina af og heldur áfram að krefjast réttlætis og bóta.
Amnesty International í Argentínu hefur stutt þolendurna og fjölskyldur þeirra í gegnum allt ferlið. Réttarhöldin eru mikilvægt skref í átt að réttlæti.
Málið er táknrænt um nauðsyn þess að bregðast við ofbeldi sem á rætur að rekja til fordóma og mismununar gegn hinsegin fólki.
Amnesty International hefur jafnframt lagt fram lagalega greinargerð þar sem bent er á að samkvæmt alþjóðlegum mannréttindastöðlum ber ríkinu skylda að rannsaka slík brot og sækja gerendur til saka.
Belgía
Sögulegur dómur áfrýjunardómstóls í Brussel frá 2. desember 2024 sem staðfesti ábyrgð Belgíu á brottnámi og kynþáttaaðskilnaði Métis-barna (blandaðra af evrópskum og afrískum uppruna) á nýlendutíma Belgíu var látinn standa í maí eftir að áfrýjun belgíska ríkisins var hafnað. Dómstóllinn skilgreindi þessi brot sem glæpi gegn mannúð.
Í úrskurði sínum staðfesti hæstiréttur Belgíu ábyrgð belgíska ríkisins á glæpum gegn mannúð sem framdir voru á nýlendutímanum, sem og rétt þolenda til skaðabóta og annarra úrbóta.
Alþjóðaskrifstofa Amnesty International mun, í samstarfi við African Futures Lab og frönskumælandi deildina í Belgíu, halda áfram að beita sér fyrir réttlæti fyrir Métis-fólkið og tryggja að það fái þær bætur og úrbætur sem því ber.
Brasilía
Í maí 2026 hafnaði svæðisbundinn alríkisdómstóll þriðja umdæmis í Brasilíu báðum áfrýjunum leikarans Juan Darthés vegna sakfellingar hans fyrir kynferðisofbeldi gegn leikkonunni og baráttunkonunniThelmu Fardin. Þessi niðurstaða markar enn eitt framfaraskrefið í þessu sögulega máli. Málið er táknrænt fyrir baráttuna gegn refsileysi vegna kynbundins ofbeldis í Suður-Ameríku.
„Eftir margra ára baráttu er þessi niðurstaða mikilvægt skref í átt að réttarkerfi sem hlustar á þolendur, tekur kynbundið ofbeldi alvarlega og sendir stúlkum og konum um alla Rómönsku Ameríku skýr og öflug skilaboð.“ Thelma Fardin.
Alþjóðlegt
Allsherjarþing Sameinuðu þjóðanna samþykkti með yfirgnæfandi meirihluta sögulega ályktun um ábyrgð ríkja í tengslum við loftslagsbreytingar. Í ályktuninni er viðurkennt að ríkjum beri lagalegar skyldur til að bregðast við þeirri mannréttindaneyð sem loftslagsbreytingar valda, í samræmi við ráðgefandi álit Alþjóðadómstólsins í Haag (ICJ) frá árinu 2025. Laganemar í Vanúatú, eyríki í Kyrrahafi, áttu frumkvæðið að því að fá þetta álit.
Vanúatú hafði síðan frumkvæði að þessari nýju ályktun Sameinuðu þjóðanna sem Amnesty International studdi. Hún sýnir þann öfluga árangur sem næst þegar fólk, borgarasamfélagið og grasrótarhreyfingar vinna saman að sameiginlegu markmiði.
Líbía
Í maí vaknaði loks von um að gerendur yrðu dregnir til ábyrgðar eftir margra ára skrásetningu Amnesty International á mannréttindabrotum í Líbíu. Khaled El Hishri, háttsettur meðlimur alræmdru vopnuðu sveitarinnar DACTO, einnig þekkt sem al-Radaa, mætti fyrir Alþjóðlega sakamáladómstólinn (ICC) þar sem hann var ákærður fyrir stríðsglæpi og glæpi gegn mannúð.
Amnesty International hefur um árabil skrásett hrikaleg mannréttindabrot framin refsilaust í Mitiga-fangelsinu í Trípólí undir stjórn al-Radaa (DACTO). Á meðal brota eru pyndingar og önnur ill meðferð, ólögmæt manndráp, þvinguð mannshvörf auk annarra alþjóðaglæpa og alvarlegra mannréttindabrota.
Noregur
Norskur dómstóll hafnaði beiðni grískra stjórnvalda um að framselja Tommy Olsen, stofnanda samtakanna Aegean Boat Report. Grísk yfirvöld höfðuðu sakamál gegn honum og gáfu út evrópska handtökuskipun vegna starfa hans við að skrá og upplýsa um mannréttindabrot gegn flótta- og farandfólki við strendur Grikklands. Í kjölfar þess að Tommy Olsen var handtekinn í Noregi hóf Amnesty International undirskriftasöfnun og skoraði á norsk stjórnvöld að hafna framsalsbeiðni Grikklands. Amnesty International benti á að engin sönnunargögn styddu sakargiftirnar á hendur honum og að um væri að ræða misbeitingu á löggjöf gegn smygli á fólki.
„Þetta mál snerist aldrei aðeins um mig persónulega. Það snerist um það hvort hægt sé að gera það refsivert í Evrópu að skrá mannréttindabrot og sýna fólki á flótta samstöðu. Ég er innilega þakklátur Amnesty International og öllum þeim sem gripu til aðgerða til að styðja mig í þessu ferli.
Olsen á enn yfir höfði sér sakamál í Grikklandi og handtökuskipunin á hendur honum er enn í gildi. Amnesty International mun halda áfram að berjast gegn því að samstaða með flótta- og farandfólki sé gerð refsiverð.
Suður-Afríka
Þögul mótmælaaðgerð Amnesty International í Suður-Afríku varð til þess að stjórnvöld brugðust við. Þar var krafist verndar mannréttindafrömuða og að lögregla rannsaki morð og áreitni sem þeir hafa sætt.
Settur lögreglumálaráðherra, Firoz Cachalia, aðstoðarráðherra hans, Cassel Mathale, og aðstoðardómsmálaráðherra, Andries Nel, lýstu opinberlega yfir stuðningi við þessa herferð Amnesty International. Aðstoðardómsmálaráðherrann hefur jafnframt samþykkt að funda með Amnesty International til að ræða nauðsyn lagasetningar um vernd mannréttindafrömuða.
Nígería
Rannsóknir og opinber herferð Amnesty International beindu athygli á landsvísu að ásökunum um mannréttindabrot sérsveitar nígerísku lögreglunnar sem kölluð er Tiger Base og hefur það hlutverk að berjast gegn mannránum og vopnuðum ránum í Owerri í Imo-fylki. Herferðin #Endtigerbase leiddi til beinna viðræðna við ríkislögreglustjórann og lögregluna í Imo-fylki. Jafnframt fékk Amnesty International aðgang að bækistöð Tiger Base og átti fund með æðstu stjórnendum um ábyrgð og umbætur.
Yfirvöld tilkynntu meðal annars að starfsemi Tiger Base yrði lögð niður í núverandi mynd og ný lögreglusveit sett á fót í hennar stað. Jafnframt yrði agaviðurlögum beitt gagnvart nokkrum lögreglumönnum sem tengdust brotunum. Amnesty International mun áfram fylgjast með þróun mála og fordæma lögregluofbeldi.
Tyrkland
Defne Güzel, formaður 17. maí-samtakanna og baráttukona fyrir réttindum hinsegin fólks, var sýknuð eftir að hafa sætt sakamáli vegna efnis sem birt var á vefsíðu samtakanna og á samfélagsmiðlum þeirra. Yfirvöld héldu því fram að efnið sem birt var félli ekki að lögbundnu hlutverki samtakanna og bryti gegn víðtækt skilgreindum ákvæðum hegningarlaga sem ætlað er að vernda siðferði og þroska barna og ungmenna.
Amnesty International hrinti af stað ákalli vegna máls Güzel. Hún átti yfir höfði sér eins til þriggja ára fangelsisdóm og hefði hún verið sekt fundin sek.
Júní
Alþjóðlegt
Sérstakur skýrslugjafi Sameinuðu þjóðanna birti tilmæli sín um alþjóðlegan samning um viðskipti án pyndinga. Tillögurnar eru mikilvæg viðbót við alþjóðlegt ákall þolenda pyndinga og Torture-Free Trade Network, samstarfsvettvangs borgarasamfélagsins um gerð slíks samnings. Amnesty International er einn af stofnaðilum samstarfsvettvangsins.
Tillögurnar byggja á skýrslu sérstaks skýrslugjafa Sameinuðu þjóðanna um pyndingar frá árinu 2023 um slíkan alþjóðasamning en Amnesty International lagði sitt af mörkum við gerð skýrslunnar. Í tillögunum er að finna leiðbeiningar sérfræðings Sameinuðu þjóðanna um hvernig samningurinn gæti litið út í framkvæmd og hvaða skref ríki þurfa að stíga til að hann verði að veruleika. Tillögurnar verða mikilvægt framlag til að þrýsta á gerð þessa alþjóðasamnings.
Alþjóðlegt
Þann 26. júní birti Evrópunefnd um félagsleg réttindi samhljóða ákvörðun sína vegna sameiginlegrar kæru sem Amnesty International og Médecins du Monde International lögðu fram gegn Svíþjóð. Nefndin komst að þeirri niðurstöðu að Svíþjóð hefði brotið gegn Félagsmálasáttmála Evrópu. Brotið hefur verið á rétti til heilbrigðisþjónustu án mismununar vegna skorts á kerfisbundnum jöfnum aðgangi farandfólks í viðkvæmri stöðu frá öðrum ríkjum Evrópusambandsins að heilbrigðisþjónustu.
Í kærunni voru rakin 129 mál sem sýndu fram á að sænsk stjórnvöld hefðu með kerfisbundnum hætti neitað farandfólki í viðkvæmri stöðu, þar á meðal fjölmörgu Rómafólki, um aðgang að heilbrigðisþjónustu og krafið það um fulla greiðslu. Afleiðingin var sú að margt fólk í þessum hópi treysti sér ekki til að leita sér nauðsynlegrar heilbrigðisþjónustu og stofnaði þannig heilsu og jafnvel lífi sínu í alvarlega hættu.
Þessi tímamótaniðurstaða þarf að vera fordæmisgefandi um hvernig tryggja beri öllum aðgang að heilbrigðisþjónustu og læknismeðferð, óháð aðstæðum þeirra. Það á ekki aðeins við um Svíþjóð heldur öll aðildarríki Evrópusambandsins.