Í nýrri skýrslu Amnesty International er greint frá alvarlegum skorti á geðheilbrigðisþjónustu í Síerra Leóne fyrir fólk sem hefur orðið fyrir sálrænum áföllum í kjölfar grimmilegrar borgarastyrjaldar og skæðs ebólufaraldurs.

Þegar Ciham Ali var 15 ára reyndi hún að yfirgefa Erítreu en stjórnvöld handtóku hana. Ekki hefur sést til hennar síðan og nú eru liðin átta ár. Hjálpaðu okkur að finna Ciham og leysa úr haldi.

Í Nígeríu hefur almennum borgurum verið nauðgað, þeir pyndaðir og kúgaðir og jafnvel myrtir af lögreglumönnum sem tilheyra sérsveit lögreglu gegn ránum, SARS (e. Special Anti-Robbery Squad). Stjórnvöld í Nígeríu neyddust til að leggja niður sérsveitina í kjölfar mótmæla en það er ekki nóg. Fórnarlömb þessara glæpa bíða enn réttlætis. Kallað er eftir því að bundið verði enda á refsileysi vegna glæpa SARS-sérsveitarinnar.

Áfrýjunardómstóll í Suður-Súdan felldi úr gildi dauðadóm yfir Magai Matiop Ngong sem var aðeins 15 ára þegar brotið átti sér stað. Mál hans hefur verið sent áfram til hæstaréttar til að kveða upp viðeigandi dóm í stað dauðadómsins. Magai var fluttur af dauðadeild þann 29. júlí. Magai var dæmdur fyrir morð árið 2017 sem hann sagði að hefði verið slys. Hann fékk ekki lögfræðing við fyrstu rétt­ar­höldin.

Hópur flóttafólks og umsækjenda um alþjóðlega vernd hefur verið í haldi að geðþótta í Pemba, í norðausturhluta Mósambík í meira en eitt og hálft ár við hræðilegar aðstæður á lögreglustöð. Um er að ræða sextán einstaklinga frá Lýðstjórnarlýðveldinu Kongó og Eþíópíu. Vegna kórónuveirufaraldursins er heilsa þeirra í enn frekari hættu.

Ný skýrsla Amnesty International greinir frá hræðilegum afleiðingum átaka stjórnvalda og Boko Haram fyrir börn í norðausturhluta Nígeríu. Börn sem flýja svæði Boko Haram enda oftar en ekki í verri aðstæðum. Í besta falli eru þau á vergangi í harðri lífsbaráttu þar sem þau hafa lítinn eða engan aðgang að menntun. Í versta falli eru þau handtekin að geðþótta af hernum og þeim haldið árum saman við aðstæður sem teljast til pyndinga og annarrar illrar meðferðar. Einnig kemur fram í skýrslunni að alþjóðlegir aðilar hafi styrkt gallaða endurhæfingu fyrir meinta fyrrum hermenn Boko Haram sem í raun er ólögmætt varðhald barna og fullorðinna.

Saïkou Yaya Diallo, aðgerðasinni og aðstoðarmaður lögfræðings hjá stjórnarandstöðuflokknum National Front for the defense of the constitution (FNDC) var handtekinn þann 7. maí og settur í varðhald í Conakry, höfuðborg Gíneu, í kjölfar atviks sem átti sér stað á blaðamannafundi hjá stjórnmálaflokknum. Þann 12. maí var hann kærður fyrir líkamsárás, ofbeldi, hótanir og óspektir á almannafæri. Saïkou er með sykursýki sem krefst sérstaks mataræðis og meðhöndlunar og því í áhættuhópi vegna kórónuveirufaraldursins. Sama dag staðfestu stjórnvöld í Gíneu 58 tilfelli af COVID-19 smitum í fangelsinu og þrjú dauðsföll af völdum veirunnar.

Fram kemur í ársskýrslu Amnesty International fyrir árið 2019 að mótmælendur í Afríku sunnan Sahara hafi barist fyrir réttindum sínum gegn átökum og kúgun þrátt fyrir hættu á skotárásum eða barsmíðum. Í skýrslunni er greint frá mótmælum og harkalegum viðbrögðum stjórnvalda, mannréttindabrotum og átökum víðsvegar á svæðinu. Herjað var á aðgerðasinna og fjölmiðlafólk og þúsundir óbreyttra borgara þjáðust vegna átaka.

Blaðamanninum Mamane Kaka Touda er haldið í fangelsi í Niamey í Níger fyrir að birta færslu á samfélagsmiðlum varðandi grun um COVID-19 smit á gjörgæsludeild spítalans í borginni.

Þann 24. desember var rannsóknarblaðamaðurinn Ignace Sossou dæmdur í 18 mánaða fangelsi og til að greiða sekt fyrir „áreitni á netinu“ í Benín fyrir tíst á Twitter með tilvitnun í ummæli ríkissaksóknara. Ríkissaksóknarinn heldur því fram að ummæli hans hafi verið tekin úr samhengi og lagði fram kvörtun vegna ummæla Ignace Sossou til dómstóla í Benín. Ignace Sossou er í haldi að geðþótta. Leysa þarf hann úr haldi umsvifalaust án skilyrða.

Þann 17. ágúst var háskólakennarinn Firew Bekele handtekinn og ákærður samkvæmt harkalegum hryðjuverkalögum (e. Anti-Terrorism Proclamation) Eþíópíu. Á seinasta áratug hafa lögin verið notuð til að bæla niður andstöðu. Firew Bekele er ákærður fyrir að skrifa bók sem gagnrýnir forsætisráðherra Eþíópíu, Abiy Ahmeden, enhann neitar að hafa skrifað bókina. Firew Bekele er samviskufangi sem þarf að leysa tafarlaust úr haldi án skilyrða.

Aðgerðasinni frá Senegal, Guy Marius Sagna, var ákærður fyrir „falskar hryðjuverkaaðvaranir“ þann 5. ágúst síðastliðinn. Hann var handtekinn að geðþótta þann 16. júlí í höfuðborginni Dakar en leystur úr haldi mánuði síðar. Guy var yfirheyrður vegna tveggja Facebook-færslna þar sem hann fjallaði um skort á fullnægjandi læknisaðstöðu í Senegal og einnig fyrir innlegg sitt á Facebook-síðu sinni um veru franska hersins í Afríku.