Jackie Umuhoza var handtekin að morgni dags þann 27. nóvember 2019 í Kígali í Rúanda. Þegar fjölskylda hennar og vinir vöktu athygli á hvarfi Jackie á samfélagsmiðlum daginn eftir staðfesti rannsóknarskrifstofa Rúanda handtöku hennar í tísti á Twitter. Ástæða handtökunnar var sögð grunur um landráð og njósnir. Jackie er enn í haldi og hefur mál hennar ekki enn farið fyrir dóm.
Jackie Umuhoza er dóttir Deo Nyirigira, safnaðarprests í Úganda. Deo Nyirigira og fjölskylda hans fóru frá Rúanda til Úganda árið 2001 í kjölfar ofsókna. Nýlega hafa fjölmiðlar sem styðja stjórnvöld í Rúanda sakað Deo Nyirigira um að safna liði í stjórnarandstöðuflokkinn Rwanda National Congress sem er í útlegð frá Rúanda. Dætur hans þrjár Lilian Umutoni, Axelle Umutesi og Jackie Umuhoza hafa allar snúið aftur til Rúanda að loknu háskólanámi í Úganda. Fjölskyldan staðfestir að frá árinu 2017 hafi systurnar ítrekað verið kallaðar í yfirheyrslur vegna aðgerða föður þeirra og í mars 2019 voru þær handteknar og settar í varðhald í eina viku. Úgönsk persónuskilríki þeirra og vegabréf voru tekin af þeim en rúöndsk persónuskilríki og vegabréf þeirra höfðu verið tekin að þeim árinu áður. Lilian Umutoni og Axelle Umutesi voru einnig handteknar þann 27. nóvember síðastliðinn en var sleppt úr haldi daginn eftir.
Ekki hefur verið gefin út ákæra á hendur Jackie Umuhoza og er hún því í haldi að geðþótta stjórnvalda. Netákallsfélagar krefjast þess að hún verði leyst úr haldi tafarlaust og fái greiðan aðgang að fjölskyldu sinni, heilbrigðisþjónustu og lögfræðiþjónustu.