Baráttumaður í fangelsi

Fangelsaður fyrir að vernda landsvæði frumbyggja

Bern­ardo Caal Xol tilheyrir samfé­lagi Q’eqchi’ sem eru Maya-frum­byggjar í Gvatemala. Í störfum sínum sem kennari og verka­lýðs­leið­togi hefur Bern­ardo kapp­kostað að efla og styrkja samfélag sitt.

Hann hefur einnig gert allt sem í hans valdi stendur til að vernda með frið­sam­legum hætti land­svæði Maya-frum­byggja og nátt­úru­legar auðlindir. Þegar fyrir­tæki var veitt leyfi stjórn­valda til að reisa tvær vatns­afls­virkj­anir við ána Cahabón, sem er heilög í augum Maya-frum­byggja, ákváðu Bern­ardo og hans fólk að mótmæla.

Uppbygging vatns­afls­virkj­an­anna hafði þegar eyðilagt skóginn þeirra og nú stóðu Maya-frum­byggjar frammi fyrir því að missa vatnið sem var lífs­við­ur­væri þeirra. Bern­ardo krafðist þess að hætt yrði við fram­kvæmdir við vatns­afls­virkj­an­irnar á þeim forsendum að ekki hefði verið haft samráð við frum­byggja sem búa á svæðinu, eins og krafist er í alþjóða­lögum. Aðgerð­irnar hugn­uðust hvorki fyrir­tækinu né stjórn­málaelítu landsins.

Eftir mótmælin dundi á rógs­her­ferð gegn Bern­ardo þar sem hann var endur­tekið borinn tilhæfu­lausum ásök­unum. Fljót­lega fór fram lögreglu­rann­sókn gegn honum þar sem hann var sakaður um að hafa beitt ofbeldi í mótmæl­unum gegn virkj­ana­fram­kvæmd­unum. Árið 2018 var hann dæmdur í átta ára fang­elsi þrátt fyrir skort á sönn­un­ar­gögnum.

„Af hverju er ég í fang­elsi?“ spyr Bern­ardo. „Fyrir að fordæma það sem þeir eru að gera við árnar okkar, fyrir að vernda það litla sem eftir er?“

Krefðu stjórn­völd í Gvatemala um að leysa Bern­ardo tafar­laust úr haldi.

Þau þurfa þína hjálp!

Þín undirskrift getur bjargað mannslífi

Kína

Fangelsuð vegna fréttaumfjöllunar um kórónuveiruna

Zhang Zhan skýrði frá útbreiðslu kórónuveirunnar í Wuhan-borg. Hún greindi frá því á samfélagsmiðlum að yfirvöld hefðu tekið til fanga óháða blaðamenn og áreitt fjölskyldur smitaðra einstaklinga. Hún var síðar tekin til fanga og dæmd í fjögurra ára fangelsi.

Palestína

Hótað lífláti fyrir að afhjúpa ofbeldi ísraelska hersins

Janna Jihad er 15 ára gömul og býr á Vesturbakkanum, sem er hernuminn af Ísrael. Hún var aðeins sjö ára þegar hún hóf að taka upp á símann sinn mannréttindabrot ísraelska hersins. Janna hefur verið áreitt og henni hótað lífláti.

Nígería

Læstur í neðanjarðarklefa fyrir mótmæli

Imoleayo Michael studdi mótmæli á samfélagsmiðlum gegn sérsveitinni SARS sem er alræmd fyrir ofbeldi. Í kjölfarið var hann læstur í neðanjarðarklefa í 41 dag. Hann stendur frammi fyrir fölskum ákærum og margra ára fangelsisvist.

Úkraína

Ráðist á baráttufólk fyrir réttindum kvenna og hinsegin fólks

Frjálsu félagasamtökin Sphere hafa barist fyrir réttindum kvenna og hinsegin fólks frá árinu 2006. Á undanförnum árum hafa ofbeldisfullir andstöðuhópar gegn hinsegin fólki skipulagt tugi árása á starfs- og stuðningsfólk Sphere en enginn sætir ábyrgð.

Erítrea

Sætti þvinguðu mannshvarfi 15 ára

Ciham Ali var aðeins 15 ára þegar stjórnvöld námu hana á brott í hefndaraðgerð gegn föður hennar. Níu ár eru nú liðin frá því að hún sætti þvinguðu mannshvarfi. Enginn veit hvar hún er í haldi.

Mexíkó

Skotin á mótmælum gegn ofbeldi á konum

Wendy Galarza berst fyrir réttlátara samfélagi fyrir konur í heimalandi sínu. Þær sæta oft árásum, eru niðurlægðar og myrtar. Hún týndi næstum lífi sínu við að fordæma ofbeldið.

Taíland

Stendur frammi fyrir lífstíðardómi vegna friðsamlegra mótmæla

Panusaya, kölluð Rung, kallar eftir jafnrétti og tjáningarfrelsi. Í mars 2021 var hún handtekin í 60 daga á grundvelli laga sem banna gagnrýni á konungsríkið. Nú stendur hún frammi fyrir fjölda ákæra og á yfir höfði sér lífstíðarfangelsi.

Hvíta-Rússland

Unglingur barinn, gefið raflost og fangelsaður

Mikita Zalatarou, sem er flogaveikur, var 16 ára þegar hann var handtekinn og ásakaður um að kasta bensínsprengju í átt að óeirðalögreglu. Hann var í kjölfarið fangelsaður, pyndaður og dæmdur í fimm ára fangelsi.