Nígería
Stjórnvöld í Nígeríu bönnuðu Twitter þann 4. júní í landinu og skipuðu netþjónustufyrirtækjum að loka fyrir Twitter. Fjölmiðlar þurftu einnig að loka Twitter-reikningum sínum. Þessar aðgerðir brjóta á tjáningarfrelsinu, fjölmiðlafrelsi og skerða aðgengi að upplýsingum. Friðsamir mótmælendur hafa mætt ofbeldisfullum aðgerðum af hálfu nígerískra yfirvalda og nú á einnig að þagga niður í röddum þeirra á netinu.
Kólumbía
Síðan 28. apríl hafa þúsundir tekið þátt í mótmælum víðsvegar um Kólumbíu. Mótmælin byrjuðu vegna fyrirhugaðra skattalagabreytinga en hafa þróast í mótmæli vegna viðbragða stjórnvalda við efnahags- og félagslegum vandamálum í kjölfar kórónuveirufaraldursins. Stjórnvöld hafa brugðist við með að beita hervaldi í nokkrum borgum þar sem mótmælendur eru beittir óhóflegu valdi með vopnum sem hefur leitt tugi einstaklinga til dauða og enn fleiri særða.
Hong Kong
Þjóðaröryggislög tóku gildi þann 30. júní 2020 í Hong Kong. Skilgreiningin á „þjóðaröryggi“ er óljós í lögunum og þeim hefur verið beitt að geðþótta til að skerða tjáningar-og fundafrelsið og bæla niður alla stjórnarandstöðu. Nú þegar hafa 118 einstaklingar verið handteknir á grundvelli laganna, þar af þrír undir 18 ára aldri og 64 hafa verið ákærðir. Sumir standa frammi fyrir lífstíðarfangelsi.
Alsír
Alsírsk stjórnvöld nýta sér kórónuveirufaraldurinn til að herja á aðgerðasinna, fangelsa stjórnarandstæðinga og þagga niður í fjölmiðlum. Það verður að leysa úr haldi alla einstaklinga sem er haldið fyrir það eitt að nýta sér rétt til tjáningar og friðsamlegra mótmæla. Það verður einnig að fella niður ákærur á hendur þeim. Skrifaðu undir ákall Amnesty International til verndar tjáningarfrelsinu í Alsír og krefstu þess að alsírsk stjórnvöld stöðvi varðhöld að geðþótta á Hirak-mómælendum og leysi friðsamlega mótmælendur tafarlaust úr haldi án skilyrða.
Danmörk
Dönsk yfirvöld staðhæfa að höfuðborgin Damaskus og nágrenni hennar séu örugg svæði í Sýrlandi. Þrátt fyrir að loftárásir og átök séu hætt á sumum svæðum, vofir enn hætta yfir þar sem sannanir eru fyrir því að pyndingar, þvinguð mannshvörf og varðhaldsvist eigi sér enn stað í landinu. Dönskum yfirvöldum er skylt að vernda sýrlenskt flóttafólk og verða að hætta við endursendingar flóttafólks til Sýrlands. Sýrlenska flóttafólkið flúði til Danmerkur til að forðast átök og ofsóknir. Það er ótækt að því sé skipað að snúa aftur í hættuna sem það flúði. Sýrlenska flóttafólkið þarf á vernd að halda. Þrýstu á utanríkisráðherra Danmerkur, Mathias Tesfaye, um að snúa við ákvörðunum um endursendingar sýrlensks flóttafólks og endurnýja landvistarleyfi þeirra.
Hvíta-Rússland
Raman Pratasevich, blaðamaður á flótta sem hefur gagnrýnt ríkisstjórnina, var handtekinn án dóms og laga 23. maí af stjórnvöldum í Hvíta-Rússlandi ásamt maka sínum Sofiu Sapega. Þau voru í flugi frá Aþenu til Vilníus þegar vélinni var beint í aðra átt og gert að lenda í Minsk. Raman Pratasevich var eftirlýstur vegna „hryðjuverka“ fyrir vinnu sína sem blaðamaður. Ef dæmdur sekur getur hann átt yfir höfði sér 20 ára fangelsisvist. Krefstu þess að Raman og Sofia verði leyst úr haldi skilyrðislaust og án tafa og að gripið verði til aðgerða til að stöðva illa meðferð þeirra.
Nepal
Ein og hálf milljón Nepala sem eru í áhættuhópi vegna kórónuveirufaraldursins bóluefnið Oxford-AstraZeneca. Þessi hópur þarf að fá næstu bólusetningu fyrir 5. júlí til að virkni bóluefnisins sé tryggð, en bóluefnið er á þrotum í Nepal. Skrifaðu undir strax og þrýstu á bresk stjórnvöld að bregðast við vandanum með því að senda birgðir til Nepal svo hægt sé að bólusetja áhættuhópinn með seinni bólusetningu sinni áður en það verður of seint. Krefstu þess einnig að hugverkaleyfum bólusetninga verði aflétt í kórónuveirufaraldrinum svo hægt sé að deila þekkingu og tækni til að tryggja sem mesta framleiðslu bóluefna.
Bandaríkin
Bandaríkin verða að þrýsta á Ísrael að takast á við rót vandans og binda enda á mannréttindabrot og óréttlæti. Það er tími til kominn að þrýst sé á Ísrael að takast á við rót vandans á svæðinu, nú þegar heimurinn horfir á stigvaxandi átök milli Ísraels og hernumdu svæða Palestínu. Rót vandans á þessum mannréttindabrotum sem eiga sér stað núna er kerfisbundin mismunun, eignarsvipting og nauðungarflutningar sem Palestínubúar hafa þurft að þola af hálfu Ísraels.
Gvatemala
Bernardo Caal Xol var sviptur frelsi fyrir tveimur árum síðan. Hann er ranglega fangelsaður vegna friðsamlegra aðgerða hans til að vernda landsvæði í Alta Verapaz sem er í norðurhluta Gvatemala. Bernardo er samviskufangi og á ekki að vera sviptur frelsi sínu fyrir að mótmæla ágangi gegn náttúrunni með friðsömum hætti. Krefstu þess að ríkissaksóknari grípi til viðeigandi aðgerða til að leysa Bernardo úr haldi og rannsaka hverjir áttu þátt í ólögmætri handtöku hans.
Nígería
Aðgerðasinnarnir Larry Emmanuel og Victor Anene Udoka mótmæltu spillingu og bágri stöðu mannréttinda í Nígeríu þann 5. apríl síðastliðinn og hafa verið í ólögmætu varðhaldi síðan. Þeir eru í haldi fyrir það eitt að nýta tjáningarfrelsi sitt og rétt sinn til að mótmæla með friðsömum hætti. Skrifaðu undir og krefstu þess að Larry Emmanuel og Victor Anene Udoka verði tafarlaust látnir lausir án skilyrða.
Rússland
Heilsu Aleksei Navalny fer hrakandi með hverjum degi á meðan hann er í fangelsi. Navalny hefur greint frá því að honum sé meinuð læknisaðstoð og meinaður svefn þar sem fangaverðir vekja hann á klukkutíma fresti á hverri nóttu. Rússlandi ber skylda til að virða og vernda rétt fanga til lífs og heilsu og vernda þá gegn pyndingum og annarri illri meðferð. Þrýstu á Vladimir Putin forseta Rússlands að leysa Aleksei Navalny tafarlaust úr haldi og tryggja að hann fái trausta læknisaðstoð á meðan hann er í fangelsi.
Alþjóðlegt
Í kórónuveirufaraldrinum hefur hagnaður netsölurisans Amazon aukist gríðarlega og forstjórinn Jeff Bezos telst nú með ríkustu mönnum heims. Á sama tíma er heilsu starfsfólks fyrirtækisins ógnað vegna óöruggra vinnuskilyrða á tímum faraldursins. Til að koma í veg fyrir að starfsfólki nýti rétt sinn til að mynda eða ganga í stéttarfélag hefur starfsfólk verið rekið eða ávítt í kjölfar kvartana út af skertum vinnuskilyrðum. Sýndu starfsfólki Amazon stuðning með undirskrift þinni.
Bangladess
Kórónuveirufaraldurinn hefur gert aðstæður Róhingja í flóttamannabúðum Cox Bazar í Bangladess enn þungbærari. Aðgengi að heilbrigðisþjónustu er skert vegna tungumálaörðugleika, illrar meðferðar frá heilbrigðisstarfsfólki og ófullnægjandi aðgengi upplýsinga um þá heilbrigðisþjónustu sem stendur til boða. Þrýstu á stjórnvöld í Bangladess og alþjóðasamfélagið að tryggja þátttöku Róhingja flóttafólks í ákvarðanatöku sem snýr að þeirra eigin lífi til að tryggt sé að mannréttindi þeirra séu vernduð.
Hondúras
Berta Cáceres var myrt að nóttu til þann 2. mars 2016 á heimili sínu í Intibucá í Hondúras. Berta Cáceres var hugrökk baráttukona fyrir mannréttindum sem hætti lífi sínu til að verja rétt Lenca-fólksins, heimahaga sinna og náttúruauðlindanna sem þar finnast. Fyrir fjölskyldu Bertu verður réttlætinu ekki fullnægt fyrr en allir sem viðriðnir voru morðið hafa verið sóttir til saka og sannleikurinn leiddur í ljós.
Íran
Mehran Raoof, bresk-íranskur baráttumaður fyrir réttindum verkafólks, var handtekinn í Íran þann 16. október 2020. Hann hefur verið í einangrun síðan þá. Einangrunarvist sem stendur yfir í 22 tíma eða lengur á sólarhring og umfram 15 daga er brot á banni gegn pyndingum og annarri illri meðferð. Mehran Raoof var eingungis handtekinn vegna baráttu sinnar fyrir réttindum verkafólks og stuðnings við verkalýðsfélög.
Þú ætlar að styðja og .
Skrifaðu undir og Amnesty á Íslandi sendir viðeigandi aðilum bréf í þínu nafni. Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
Engar aðrar persónuupplýsingar en nafn þitt munu fylgja bréfinu á viðkomandi stjórnvöld.
